23 ноября 2016 г.
Професси суйласа ил
Ноябрĕн 25-мĕшĕччен волонтер-профориентаторсен «Професси суйласа ил» акци пырать.
Чăваш Республикин Ĕçлев тата социаллă хÿтлĕх министерстви асăннă акцие 2008 çултанпа йĕркелет. Унăн тĕп тĕллевĕ - шкулсенче вĕренекенсене професси суйласа илме пулăшасси, техника специальноçĕсем çинчен тĕплĕнрех пĕлтересси, Чăваш Енри ĕç рынокне палăртасси.
Акци мероприятийĕсем республикăри кашни хулапа районта иртеççĕ. Малтанлăха палăртнă тăрăх, акцие 2,8 пин ытла волонтер хутшăнмалла. Шкулсенчи педагогсем, психологсем, студентсем, библиотекăсемпе ялхуçалăх ĕçченĕсем 311 ытла экскурси ирттерĕç, ĕç паракансемпе 400 ытла тĕлпулу йĕркелĕç.
Курав ĕçлет
Çĕнĕ Пăвари культура çуртĕнче «Вилĕме ăçта сутнине пĕлтер» акцие хутшăнса курав йĕркеленĕ.
Курава сывă пурнăç йĕркине сарас, наркомани сиен-лĕхне уçса парас, преступленисемшĕн явап тыттарас енĕпе çыхăннă материалсем тăратнă.
Культура ĕçченĕсем яшсемпе хĕрсене сывă пурнăç йĕркине тытса пымалли правилăсемпе паллаштарнă.
«Ачасем тата çемье»
акцие хутшăнаççĕ социаллă пулăшу паракан центрăн специалисчĕсем.
Вĕсем ноябрĕн 11-18-мĕшĕсенче йывăр пурнăç условийĕсенче пурăнакан çемьесенче пулнă, çавăн пекех ыркăмăллăх акцийĕсем ирттернĕ. Çак тапхăрта специалистсем 19 çемьене çитнĕ. З.Горшкова, Т.Исаева, В.Серафимова çемйисене япаласемпе пулăшнă. Çавăн пекех йывăр условисенче пурăнакан ачасене «Белые камни», «Солнышко» сывлăх лагерĕсене канма янă.
Екатерина Ертмакова - виççĕмĕш
«Сăрçи» заповедник «Парксен маршĕ - 2016» акцие хутшăнса пĕтĕм тĕнчери пултарулăх конкурсне ирттернĕ.
Республика шайĕнчи конкурсра Елчĕкри искусство шкулĕнче вĕренекенсем - Екатерина Ертмакова, Карина Сивкова, Виктория Сайкина çĕнтернĕ.
Мускавра ирттернĕ конкурсра Екатерина Ертмакова виççĕмĕш вырăна тухнă. Екатерина ăсталăха Р.Парферьева преподаватель ертсе пынипе туптать.
Ĕçе вырнаçмалла
Ноябрĕн 21-мĕшĕ тĕлне районти халăха ĕçпе тивĕçтерекен центра 749 çын килнĕ.
Хальхи вăхăтра официаллă майпа ĕç шыракан 35 çын шутланать. Вĕсенчен 21-шĕ ĕçсĕрлĕхшĕн паракан пособие илет.
Паянхи кун тĕлне 673 çынна ĕçе вырнаçтарнă.