19 ноября 2016 г.
Районти Депутатсен пухăвĕн черетлĕ ларăвĕнче район малашлăхне палăртакан ыйтусене тишкернĕ.
Район администрацийĕн экономика, пурлăх тата çĕр хутшăнăвĕсен пайĕн ертÿçи М.Павлова районăн 2017 çулхи тата планпа палăртнă 2018-2019 çулсенчи социаллă пурнăçĕпе экономика аталанăвĕн прогнозĕпе паллаштарнă. Вăл кашни отраслĕн аталанăвне хак панă май, прогнозăн малашнехи тĕп тĕллевĕ экономика аталанăвне çĕклеме условисем туса парасси, çынсен пурнăç пахалăхне ÿстересси, социаллă пулăшупа тивĕçтермелли тытăма çирĕплетесси, пурăнмалли чи пĕчĕк виçерен сахалрах тупăш илекенсен йышне чакарасси пулнине палăртнă. Ларăва хутшăннă депутатсем район аталанăвĕн прогнозне ырланă.
Районăн кăçалхи бюджетне депутатсем виççĕмĕш хут улшăнусем кĕртеççĕ. Çакă республика бюджетĕнчен хушма 12 миллион ытла тенкĕ кĕнипе çыхăннине пĕлтернĕ район администрацийĕн пуçлăхĕн çумĕ - финанс пайĕн ертÿçи Г.Анисимова. Улшăнусем хыççăн бюджетăн палăртакан тупăшсен пайĕ 321111823,13 тенкĕпе, тăкаксен пайĕ 324713498 тенкĕпе, дефицит 3601674,87 тенкĕпе танлашмалла.
Районти Депутатсен пухăвĕн ларăвĕнче тишкернĕ ытти ыйтусем те паллă вырăн йышăнаççĕ. Объектăн тĕллевне улăштарассине, районăн пурлăхне приватизацилемелли 2017 çулхи программине, муниципалитет служащийĕсене пенсипе тивĕçтерессипе палăртнă положение те депутатсем çирĕплетнĕ.
Ларура ĕçре палăрнисене чыслас ыйтăва та тишкернĕ.
А.КАРЛИН.