16 ноября 2016 г.
2019 çулта Шупашкар хулине никĕсленĕренпе 550 çул, 2020 çулта Чăваш автономи облаçне туса хунăранпа 100 çул çитнине уявлама хатĕрленекен ĕç ушкăнĕн ларăвĕ иртнĕ. Ăна Чăваш Енĕн премьер-министрĕ Иван Моторин ертсе пынă.
Культура министрĕ Константин Яковлев пĕлтернĕ тăрăх, Чăваш Енĕн кун-çулĕнчи паллă пулăмсене чыслă уявлама федераци бюджетĕнчен укçа уйăраççĕ. Ăна илмелли заявкăна Чăваш Енĕн 2017 çулхи майăн 1-мĕшĕччен хатĕрлесе РФ Культура министерствине çитермелле.
Раççей Культура министерстви Чăваш Автономи облаçне туса хунăранпа 100 çул çитнине уявлама федераци бюджетĕнчен 429,9 миллион тенкĕ субсиди уйăрать.
Шупашкар хулине никĕсленĕренпе 550 çул çитнине паллă тума федераци бюджетĕнчен 7,7 миллион тенкĕ уйăрма палăртнă.
Паллах, уявсене паллă тума Чăваш Республикин бюджетĕнчен те укçа-тенкĕ уйăрĕç.
Ларăва пĕтĕмлетнĕ май, Иван Моторин Чăваш Енĕн паллă пулăмĕсене уявлама хатĕрленсе ирттерессишĕн яваплă министерствăсен федераци бюджетĕнчен субсиди илме кирлĕ документсен пуххине вăраха тăсса ямасăр хатĕрлемеллине палăртнă.