16 ноября 2016 г.
Полицин районти пайĕн оперативлă ĕç-хĕлĕн ытти уйрăмĕсемпе пĕрлех участоксен уполномоченнăйĕсем те пысăк пĕлтерĕшлĕ. Хальхи вăхăтра Раççей Шалти ĕçсен министерствин муниципалитетсем хушшинчи «Комсомольский» уйрăмĕн полицин Елчĕк районĕнчи пайĕн полицин участоксенчи уполномоченнăйĕсен тата çул çитменнисемпе ĕçлекен инспекторĕсен пайĕнчи 5 участковăй районти 9 ял тăрăхĕнчи 53 ялшăн яваплă. Елчĕкпе Аслă Елчĕк ял тăрăхĕсенче полицин майорне Н.Васильева, Тăрăм тата Курнавăш ял тăрăхĕсенче полицин капитанне Н.Вершковăна, Аслă Пăла Тимеш ял тăрăхĕнче полицин майорне Э.Никонова, Лаш Таяпа ял тăрăхĕнче полицин лейтенантне И.Абейдуллина, Çирĕклĕ Шăхаль, Кĕçĕн Таяпа, Аслă Таяпа ял тăрăхĕсенче полицин капитанне Н.Байдуганова пĕлмен çын çук та пулĕ. Тĕрĕссипе, вĕсем вырăнти халăхшăн «хĕресне ашшĕ» вырăнĕнчех. Участковăйсем çынсен уйрăм тата право хăрушсăрлăхне тивĕçтереççĕ, преступниксен çулне пÿлсе лартас, вĕсене уçса парас енĕпе тимлеççĕ, участоксенчи уйрăм çынсен, предприятисемпе организацисен, ялхуçалăх предприятийĕсемпе хресчен ?фермер/ хуçалăхĕсен интересĕсене, прависене хÿтĕлеççĕ. Пĕри килте чашăк-кашăк шăкăртатнăшăн кăмăлсăр, тепри кÿрши ун пахчине кĕрсе кайнăшăн евитлет, виççĕмĕшĕ килте килĕшÿ çуккишĕн пулăшу ыйтма килет тата ытти те... Анчах участокри уполномоченнăй яланах ырă та çепĕç кăмăллă пулаймасть. Çынсем кирек мĕнле ыйтупа килсен те принциплăх, профессиллĕ ăсталăх тĕп вырăнта пулмалла. Полицин районти пайĕн участоксенчи уполномоченнăйĕсем халăхпа пĕр чĕлхе тупса ĕçлеме опычĕ çителĕклĕ. Çывхарса килекен уяв ячĕпе полицин участоксенчи уполномоченнăйĕсене саламлатăп, çăмăл мар, çапах та çынсемшĕн кирлĕ службăра ăнăçусем, çирĕп сывлăх та телей сунатăп.
В.МЕКШЕЕВ,
полицин участоксенчи уполномоченнăйĕсен тата çул çитменнисемпе ĕçлекен инспекторĕсен пайĕн ертÿçи.