12 ноября 2016 г.
Елчĕксем - иккĕмĕш
Шупашкарта, Чăваш патшалăх ялхуçалăх академийĕн спорт залĕнче «Хыпар» хаçат парнисене çĕнсе илессишĕн кире пуканĕ йăтакансен Пĕтĕм Раççейри XXXIII турнирĕ иртнĕ. Турнира тĕнчен 14 чемпионĕ, Раççейри 10 регионти 150 яхăн атлет хутшăннă.
Икĕ кун тăсăлнă турнирта Елчĕк каччисемпе хĕрĕсем те ăсталăха кăтартнă. Вĕсем, Чăваш патшалăх ялхуçалăх академийĕн атлечĕсенчен кăшт çеç каярах юлса, иккĕмĕш вырăна çĕнсе илнĕ.
Хăйсен виçисенче Д.Курчин, С.Соловьев, Е.Еремеева пьедесталăн пĕрремĕш, А.Павлов, Д.Енедеров, В.Николаева иккĕмĕш картлашки çине хăпарнă.
Турнирпа пĕрле 1998 çулта çуралнă тата çамрăкрах каччăсемпе хĕрсем хушшинче Пĕтĕм Раççей ăмăртăвĕ, Чăваш Республикин чемпионачĕ те иртнĕ. Кунта та Елчĕксен команди иккĕмĕш вырăна тухнă. Уйрăм атлетсенчен хăйсен виçисенче Н.Петров - пĕрремĕш, Д.Миллин, А.Кузнецов - иккĕмĕш, В.Кириллов, А.Данилов виççĕмĕш вырăнсене йышăннă.
Шкулти хаçатсен конкурсĕ
«Грани» издательство çурчĕ вунпĕрмĕш хут «Школа-пресс-2017» конкурс йĕркелет.
Кăçал вăл пилĕк номинаципе иртет: «Лучшая газета городской школы», «Лучшая газета сельской школы», «Лучший дизайн школьной газеты», «Лучшая новостная фотография школьной газеты», «Лучший школьный корреспондент». Конкурса хутшăнас тесен 2016 çулта кун çути курнă шкул хаçачĕн виçĕ номерне кăçалхи декабрĕн 30-мĕшĕччен çак адреспа: Çĕнĕ Шупашкар хули, Советсен урамĕ, 14 а: «Школа-пресс» конкурса тесе ярса памалла. Итогĕсем çитес çулхи январьте паллă пулаççĕ. Çĕнтерÿçĕсемпе призерсене дипломсемпе чыслаççĕ.
Арçын ачасем ытларах
ЗАГС пайĕ октябрь уйăхĕнче 17 ача çуралнине, 5 çĕнĕ çемье чăмăртаннине, 24 çын вилнине, 1 мăшăр уйрăлнине регистрациленĕ.
Иртнĕ уйăхра çуралнă ачасенчен ытларахăшĕ арçын ачасем. 6 пепке çемьери пĕрремĕш ача пулсан, иккĕмĕшсем 5 çемьере, виççĕмĕшсем 4 çемьере, тăваттăмĕшсем икĕ çемьере кун çути курнă. Шел пулин те, вилекенсен йышĕнче те арçынсем ытларах.
Юбилейре - «Тайписем»
Ялти хисеплĕ çынсене илемлĕ юрăсемпе саламлассине йăлана кĕртнĕ Лаш Таяпари «Тайпи» фольклор ушкăнĕ.
Анатолий Егоров ĕç ветеранĕ 75 çулхи юбилейне тулли кĕрекере кĕтсе илнĕ. Ачаран вăл тăван колхозра тăрăшнă. Чылай çул водительте ĕçленĕ. Анатолий Никифорович мăшăрĕпе, Александра Тимофеевнăпа, виçĕ ывăлпа хĕр пăхса ÿстернĕ.
/Район администрацийĕн сайтĕнчен/.