09 ноября 2016 г.
Тунтикун район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Вăл чи малтанах районта ялхуçалăхĕнче тата продукци ĕçлесе хатĕрлекен промышленноçра ĕçлекенсен кунне паллă туни çинче чарăнса тăчĕ. Ялхуçалăх çулне пирĕн район ĕçченĕсем ăнăçлă вĕçленĕ. Республикăри ĕçлĕ тупăшура «Ялхуçалăхне аталантарас тата Чăваш Республикинче апат-çимĕç, чĕртавар, ялхуçалăх продукцийĕсем туса илес тĕлĕшпе 2016 çулхи патшалăх мероприятийĕсен планне ăнăçлă пурнăçласа пынăшăн» номинацире Елчĕк районĕ кăнтăр зонăра пĕрремĕш вырăн йышăннă. Çавăн пекех «Ялхуçалăх производствине ăнăçлă аталантарса пынăшăн» номинацире «Комбайн» ЯХПК виççĕмĕш хут çĕнтернĕ. Район администрацийĕн пуçлăхĕ палăртнă тăрăх, юлашки 5 çулта район виçĕ хутчен çĕнтерÿçĕсен, икĕ хутчен призерсен йышне кĕнĕ. Çакăнта район администрацийĕн ялхуçалăх пайĕн начальникĕн Петр Тремасовăн тÿпи те пĕчĕк мар.
Нумаях пулмасть Чăваш Республикин Пуçлăхĕ Михаил Игнатьев хăйĕн указĕпе грантсем çирĕплетнĕ. Вĕсене экономикăна аталантарас тата инвестицисене явăçтарас тĕлĕшпе чи лайăх кăтартусем тунă хула округĕсемпе муниципалитет районĕсене параççĕ. Унăн укçи-тенки те самаях пысăк. Çав укçа-тенкĕпе районта пысăк ĕçсем туса ирттерме пулать. Николай Миллин республика Пуçлăхĕн указне пурнăçласа кашни ертÿçĕне юлашки результатсемшĕн ĕçлеме чĕнсе каларĕ.
Нумай функциллĕ центрăн 10 уйăхри ĕçĕ-хĕлĕпе унăн директорĕ Людмила Викторова паллаштарчĕ. Кăçал коллектив халăха 16000 пулăшу ĕçĕпе тивĕçтернĕ.
Экономика, пурлăх тата çĕр хутшăнăвĕсен пайĕн начальникĕ Марина Павлова вырăнти хăйтытăмлăх органĕсенче ведомствăсем хушшинчи системăра электрон мелĕпе çыхăнса ĕçлени тата нумай ачаллă çемьесене çурт-йĕр çавăрма, хуçалăха тытса пыма тÿлевсĕр çĕр лаптăкĕпе тивĕçтерес ĕç мĕнле пыни çинчен каласа пачĕ. Ведомствăсем хушшинче электрон майĕпе çыхăнса ĕçлесси пурнăçланса пырать. Кăçал ведомствăсем хушшинче ыйтса илнĕ 808 документран саккăрăшне çеç хутпа пурнăçланă, ытти пĕтĕмпех электрон мелĕпе. Тÿлевсĕр майпа çĕр лаптăкĕ илмелли списокра 56 нумай ачаллă çемье черетре. Вĕсенчен 9 çемье ыйтăвне çеç тивĕçтернĕ. Район администрацийĕн пуçлăхĕ Николай Миллин çулталăк вĕçлениччен кашни çемьене çĕр пайĕпе тивĕçтерме хушса хăварчĕ.
Полицин Елчĕк районĕнчи пайĕн начальникĕн çумĕ Алексей Карабурнашев иртнĕ эрнере право йĕркисене пăснă тĕслĕхсем çинче чарăнса тăчĕ.
Канашлура район пурнăçĕпе çыхăннă ытти ыйтусене те пăхса тухнă.