02 ноября 2016 г.
Ăсатаççĕ салтака...
Тăван çĕршыва хÿтĕлесси - кашни каччăн таса тивĕçĕ.
Аслă Елчĕкре яшсене Раççей çар ретне тăма тивĕçлĕн ăсатасси йăлана кĕнĕ. Халĕччен çар службине Никита Агеева, Константин Горшкова, Эдуард Волкова, Алексей Капсулова, Иван Савукова ăсатнă. Часах Александр Егоркин, Владимир Капсулов, Александр Кудряшов, Владимир Немцев та Тăван çĕршыв хÿтĕлевçин ретне тăрĕç.
Çавăн пекех Курнавăш тăрăхĕнчен Денис Николаев та Раççей çарне тивĕçе пурнăçлама тухса кайнă.
Тĕлпулу иртнĕ
Иртнĕ ĕмĕрти политика репрессине лекнĕ ентешсене асăнса тĕлпулу иртнĕ.
Тĕлпулăва хутшăннисем малтан Елчĕкри Николай Чудотворец часавайĕнче А.Сенькин протоиерей ертсе пынипе асăну кĕллине хутшăннă. Унтан вĕсем районти тĕп библиотекăра «Айăпсăр шар курнисем» кĕнекесемпе хаçат-журналсенчи материалсен куравĕпе паллашнă. «Çавра сĕтел» хушшинче иртнĕ тĕлпулура социаллă хÿтлĕх пайĕн, Раççей Пенси фончĕн районти пайĕн ертÿçисем И.Аникинăпа З.Яковлева, нумай функциллĕ центрăн тата тĕп библиотекăсен тытăмĕн директорĕсем Л.Викторовăпа Н.Романова тĕлпулăва хутшăннисене çăмăллăхсемпе паллаштарнă.