29 октября 2016 г.
Ăсчахăмăра халалланă
Аслă Елчĕкри Г.Н.Волков ячĕллĕ пĕтĕмĕшле пĕлÿ паракан вăтам шкулта Геннадий Никандрович Волков ентеш-этнопедагога халалласа вунăкунлăх иртет.
Чи малтанах 9-10 классенче вĕренекенсем паллă ентешĕн пурнăçĕпе ĕçĕ-хĕлĕ çинчен паллаштаракан презентаци хатĕрленĕ. 1-2 классенче вĕренекенсем вара ăсчахăмăрăн «Кил илемĕ» кĕнекери юмахĕсемпе паллашнă.
Салтака каяççĕ йĕкĕтсем
Районта кĕрхи призыв ăнăçлă пырать.
Кашни ял тăрăхĕнчи çамрăксем салтак ретне тăраççĕ. Патреккелĕнчи Егор Иванова, Тĕмерти Алексей Галкина культура çурчĕсенче савăнăçлă лару-тăрура ăсатнă. Культработниксем пулас салтаксене тĕрлĕ конкурссенче тĕрĕсленĕ.
Хусанта ăмăртнă
Сывă пурнăç йĕркине пропагандăлас, триатлона аталантарас тĕллевпе Хусанта çуран чупассипе тата шывра ишессипе /акватлон/ хулан уçă чемпионачĕ иртнĕ.
Унта Елчĕк шкулĕнчи Лиана Чернова та хутшăннă. 2002-2003 çулсенче çуралнă хĕрачасем хушшинче вăл виççĕмĕш вырăна çĕнсе илнĕ, диплома тата медале тивĕçнĕ. Лиана шывра ишес ăсталăха «Улăп» спорт комплексĕнче А.Васильев инструктор патĕнче туптать.
Çамрăк юрăçсем
Шупашкарта çамрăк юрăçсен Пĕтĕм Раççейри «Шуçăм» конкурсĕ пулнă.
Унта Елчĕкри искусство шкулĕнче вĕренекенсем те хутшăннă. 7-9 çулсенчи хĕрачасем хушшинче «Эстрада юрри» номинацире Елизавета Молодова - виççĕмĕш, 10-13 çулсенчи хĕрачасем хушшинче Ксения Агеева иккĕмĕш вырăнсене тивĕçнĕ. Çамрăк юрăçсем чăвашла тата вырăсла юрăсем шăрантарнă.
/Район администрацийĕн сайтĕнчен/.