29 октября 2016 г.
Раççей Шалти ĕçсен министерствин муниципалитетсем хушшинчи «Комсомольский» уйрăмĕн полицин Елчĕк районĕнчи пайĕ общество хăрушсăрлăхне йĕркелес тĕллевпе кăçалхи 9 уйăхра тĕрлĕ мероприяти ирттернĕ. Çакăнта вырăнти хăйтытăмлăх органĕсемпе тачă çыхăнни пулăшу парать.
Кăçал районта обществăшăн пĕлтерĕшлĕ массăллă политикăпа спортăн 25 мероприятийĕ иртнĕ. Вĕсенче полици пайĕн сотрудникĕсем общество йĕркелĕхĕпе хăрушсăрлăхне тивĕçтернĕ.
Преступленисем тăвасси чакнă. Кăçалхи 9 уйăхра 75 преступление, иртнĕ çулхи çак вăхăтринчен 15,7 процент сахалрах, шута илнĕ. Кунта ял тăрăхĕсен администрацийĕсен пуçарулăхне палăртмалла - вĕсен тăрăшулăхне пула право йĕркине сĕмсĕррĕн пăсакансен йышĕ чакса пырать.
Преступленисен 95,6 процентне уçса панă. Йывăр тата питĕ йывăр преступленисене тĕпчессипе малашне тата та ытларах ĕçлемелле.
Юлашки вăхăтра шульăксем «хастарланчĕç». Уйрăмах телефонпа, Интернетпа усă курса улталани, çынсен банк карттисенчен укçа-тенкĕ çухални шухăша ярать. Кăçалхи 9 уйăхра çакнашкал 6 тĕслĕхе тупса палăртнă, вĕсенчен 3-шне уçса панă. Ытти тĕслĕхсемпе ĕçсем малалла пыраççĕ.
Районта çаратупа çыхăннă 11 тĕслĕхрен пĕр ĕçе вĕçлеймен-ха.
Питĕ йывăр преступленисен йышĕ ÿссе пыни хумхантарать. Вĕсене районта 2 тĕслĕх кăна тупса палăртнă. Анчах Патреккелĕнчи ашшĕ ывăлне вĕлерни, Кушкăра Ульяновск облаçĕнчен килнĕ «гастролерсем» ирĕксĕрлесе транспорт хатĕрне тытса илни кашни сотруднике, асăннă ял тăрăхĕсен администрацийĕсенче ĕçлекенсене шухăшлаттарма, профилактика мероприятийĕсен çивĕчлĕхне ÿстерме тивĕç.
Обществăлла вырăнсенче, çав шутран урамсенче, çул çитмен çамрăксем, эрех-сăрапа иртĕхекенсем хушшинче право йĕркисене сĕмсĕррĕн пăсни те профилактика ĕçĕсене активлăрах пурнăçлама хистет.
А.КАРАБУРНАШЕВ,
полицин районти пайĕн ертÿçин тивĕçĕсене пурнăçлакан.