29 октября 2016 г.
Таяпа Энтринчи Йăлăмкассем пĕр-пĕринпе туслă, пĕр килти пек килĕштерсе пурăнаççĕ. Камăн çемйинче савăнăçлă уяв – яланах пĕрле. Юпа уйăхĕнче Йăлăмкассем Ивановсен кĕрекинче пулнă. Сăлтавĕ те пĕчĕк мар: касри чи хисеплĕ çынсенчен пĕри - Борис Иванов утмăл çулхи юбилейне кĕтсе илнĕ.
Ултă теçетке çула хыçа хăварнă Борис Сосипаторович хăй утса тухнă кун-çулне аса илчĕ. Пит-куçĕнче йăлтăр кулă вылярĕ, ахаль пурăнса ирттермест вăл пурнăçа. Çак тарана çитсе юратнă мăшăрĕпе çуртне, йывăçне лартнă, хĕрĕпе ывăлне çитĕнтернĕ...
Ялти шкултан вĕренсе тухнă Борис малалла СПТУра пĕлÿ пухнă. Строитель профессине илекен яш çăмăл атлетикăпа, футболла выляса пĕрре мар училище чысне хÿтĕленĕ. Алла диплом илсен Борисăн салтака кайма ят тухнă. Çирĕп вăй-халлă йĕкĕт Североморска лекет. Карап çинче виçĕ çул службăра тăрать. Аслă матрос службăри, спортри пысăк ÿсĕмсемшĕн пĕрре мар Хисеп грамоти, Тав хучĕ илнĕ. Вĕсене халĕ те типтерлĕн упрать.
Арçын тивĕçне чыслăн пурнăçласа таврăнсан Борис Елчĕкри строительство организацине хăйĕн профессийĕпе ĕçе вырнаçать. Çамрăк мастер колхозсенче фермăсем, ытти тĕрлĕ объектсем тунă çĕрте пысăк хастарлăхпа вăй хунă. Каярахпа ăна «Сельхозтехникăн» районти пĕрлешĕвне чĕнсе илнĕ. Кунта та мастер çуртсем тăвас енĕпе тимленĕ. Ырсамай тăрăхĕнче, Мир урамĕнчи çуртсем Борис Сосипаторович мастер йĕркелесе пынипе çĕкленсе ларнă. Сельхозтехника пĕрлешĕвĕнче инженер-строитель, директор çумĕ, «Яльчикское РТП» ООО директорĕ пулса тăрăшнă вăл. Ĕçри ÿсĕмсемшĕн панă наградăсем сахал мар ăста алăллă строителĕн.
Борис Сосипаторович 1984 çулта Елена Сергеевна Григорьевăпа çемье çавăрнă. Лена вăл вăхăтра Елчĕкри тĕп больницăра хирурги уйрăмĕнче медсестрара тăрăшнă. Халĕ те юратнă профессине пăрахмасть. 35 çул стационарта ĕçленĕскер, паян профилактика кабинетĕнче вăй хурать.
Елена Сергеевнăпа Борис Сосипаторович ваттисемпе пĕр чĕлхе тупса, шăкăл-шăкăл калаçса пурăнаççĕ. Ашшĕпе амăшĕ - Сосипатор Сергеевичпа Анна Осиповна çамрăксем ĕçе тухса кайнă чухне кил картинче сахал мар тăрăшнă. Халĕ сакăр теçетке çула хыçа хăварнăскерсем, пÿртре кăштăртатса çÿреççĕ, ватлăха канлĕ ирттерме тăрăшаççĕ.
Ивановсем хĕрпе ывăл çитĕнтернĕ. Полина стоматолог врача вĕренсе тухнă. Мускавра ĕçлет. Çемьеллĕ. Александр Раççей Федераци Казначействин Чăваш Республикинчи уйрăмĕнче тăрăшать. Çемье çавăрса ĕлкĕреймен-ха.
Хальхи вăхăтра Борис Сосипаторович Елчĕкри кайăк-кĕшĕк фабрикинче вăй хурать. Ĕçе пысăк яваплăхпа пурнăçлаканскер, унта та хисепе çĕнсе илнĕ вăл.
Канлĕх мĕнне пĕлмест утмăлти арçын. Çывăрса выртма юратманскер ир-ирех тăрса кил картинче ĕçлет, платник ĕçĕпе аппаланать. Тату та юратуллă пурăнакан çемьере яланах ăшă та хăтлă.
В.ВАНЮШКИНА.
Сăнÿкерчĕкре: Еленăпа Борис Ивановсем.