26 октября 2016 г.
Раççей Почти юпа уйăхĕн 13-мĕшĕнчен пуçласа 23-мĕшĕччен йĕркеленĕ çырăнтару вунăкунлăхĕ те хыçа юлчĕ. Ял çыннисенчен чылайăшĕ «Елчĕк ен» хаçата йÿнĕрех чухне çырăнса юлма тăрăшрĕ. Çырăнса юлманнисен кулянмалли çук - паян та почтальонсемпе тĕл пулма е почта çыхăну уйрăмне çитме пулать. Хальхи вăхăтра та унăн хакĕ пысăках мар - 2017 çулхи ултă уйăх тăршшĕ, эрнере икĕ хутчен, сирĕн пата çитекен район хаçачĕ 368 тенкĕ те 82 пус тăрать.
Елчĕкри почта çыхăну уйрăмĕнчи почтальонкăсем çитес çулхи пĕрремĕш çур çул валли хаçат-журнал çырăнтарас кампание активлă хутшăнаççĕ. Уйрăмра ултă почтальонка. Çак профессие парăннă Мария Горшкова 29 çул йывăр çĕклемлĕ почта сумкине йăтса Акчел ялĕн çыннисем патне васкать. Элекçей Тимеш ялĕн почтальонкин Светлана Антонован стажĕ те ÿссех пырать – вунă çул ытла. Унăн аппăшне - Галина Никитинăна та Елчĕксем лайăх пĕлеççĕ. Елчĕкри Зинаида Архипова, Вăрăмхăвари Людмила Кириллова, Патреккелĕнчи Надежда Доброхотова почтальонкăсем ял халăхĕ хаçат-журнал çырăнмасăр ан юлтăр тесе кашни çынпа тĕл пулса калаçаççĕ. Почта çыхăну уйрăмĕн ертÿçин çумĕ Ирина Теплова почтальонсен ĕçĕпе кăмăллă.
В.КИРИЛЛОВА.
Сăнÿкерчĕкре: З.Архипова, Л.Кириллова /лараççĕ/, Н.Доброхотова, С.Антонова, М.Горшкова, И.Теплова.