26 октября 2016 г.
Юпа уйăхĕн 24-мĕшĕнче Шупашкарта Пĕтĕм чăвашсен иккĕмĕш «Асам» кинофестивалĕ уçăлнă.
Ăна ЧР Кинематографистсен союзĕ, ЧР культура, национальноçсен ĕçĕсен тата архив ĕçĕн министерстви тата Чăваш наци конгресĕ йĕркеленĕ. Унăн тĕп тĕллевĕ - чăваш киноискусствине халăхра сарасси, пултаруллă çĕнĕ режиссерсем, сценаристсем, операторсем, актерсем тупса палăртасси.
Форума хутшăнакансене ЧР культура министрĕ Константин Яковлев, ЧР Патшалăх Канашĕн Председателĕ Валерий Филимонов саламланă.
Фестивале кĕске тата анлă метражлă илемлĕ, документлă тата анимаци жанрлă фильмсем хутшăнаççĕ. Конкурса тăратнă картинăсене 14 номинацире пăхса хаклаççĕ. «Чăваш киноискусствинчи пысăк çитĕнÿсемшĕн» ятарлă номинаци çирĕплетнĕ. Конкурса хутшăннă чи лайăх фильм фестивалĕн Гран-при ятне тата парнене çĕнсе илет.
Фильмсене Чăваш Республикин Наци библиотекинче, Электронлă тата кинодокументацисен патшалăх архивĕнче кăтартаççĕ.
Кино курма кăмăл тăвакансене тÿлевсĕрех кĕртеççĕ.