22 октября 2016 г.
Раççей Почтипе хаçат-журнал редакцийĕсем юпа уйăхĕн 13-23 мĕшĕсенчи 10 кунхи тапхăрта 2017 çулхи пĕрремĕш çур çул валли хаçат-журнал çырăнса илмелли хаксене чакарнипе усă курса Çирĕклĕ Шăхалĕнчи почта çыхăну уйрăмĕнче тĕрлĕ изданисене, çав шутра район хаçатне - «Елчĕк ене» 70 экземпляр ытла çырăнтарнă.
Çыхăну уйрăмĕн начальникĕ Лариса Яшина палăртнă тăрăх, юпа уйăхĕн 18-мĕшĕнче пулнă клиент кунне те ял тăрăхĕнчи вулакансем хастар хутшăннă. Çав кунхине район хаçатне анчах пĕр харăссăн 20 çын çырăннă.
Нумай хаçат-журнал илсе тăракансем, район хаçачĕпе те нихăçан уйрăлман çынсем пирки сăмах пуçарнă май Лариса Яшина вĕсен ячĕсене кăмăлтан палăртрĕ:
- Çирĕклĕ Шăхалĕнчи Илья Левый, Сильвестр Шелтуков, Тĕмерти Александр Сапожников, Мучарти Вера Никифорова, Кармалти Августина Лапшина, Элпуçĕнчи Владимир Лазарев тата ытти вулакан кашни хутĕнче хăйсене килĕшекен темиçе экземпляр хаçат-журнал çырăнаççĕ, ăна вĕсем чун апачĕ вырăнне хураççĕ, - тет вăл.
Çирĕклĕ Шăхалĕнчи сумлă мăшăрпа - Шелтуковсемпе - Тамара Ипатьевнăпа тата Сильвестр Ивановичпа эпир шăпах почта çыхăну уйрăмĕнче тĕл пултăмăр. Ялти ятлă çынсем иккĕшĕ те педагогика ĕçĕн ветеранĕсем. Сильвестр Иванович 33 çул ялти шкулта директор пулса ĕçленĕ, мăшăрĕ нумай çул вырăс чĕлхипе литературине вĕрентнĕ.
- Коммуналлă пулăшу ĕçĕсемпе усă курнăшăн тÿлеме килтĕмĕр, хамăра килĕшекен тĕрлĕрен журналсен çĕнĕ номерĕсене те яланах вырăнти почта çыхăну уйрăмĕнчен туянатпăр, - терĕ Тамара Ипатьевна.
Калаçăва Ираида Петрова почтальонка та хутшăнчĕ. Вăл Шелтуковсен çемйи хаçат-журналпа туслă пулнине, район хаçатне вара пĕр çул та сиктермесĕр çырăннине тата юратса вуланине пĕлтерчĕ.
Светлана АРХИПОВА.
Сăнÿкерчĕкре: Сильвестр Ивановичпа Тамара Ипатьевна район хаçачĕн çĕнĕ номерĕпе паллашаççĕ.