22 октября 2016 г.
Паянхи çамрăксенчен нумайăшĕ телей шыраса шкултан вĕренсе тухнă хыççăн хулана çул тытать. Хăвăлçырмара пурăнакан Георгий Валерьевич Парамонов вара, мĕн ачаран çĕр ĕçне парăнса ÿснĕскер, пурнăçне яланлăха тăван ялпа çыхăнтарнă.
1989 çулта Хăвăлçырмари вăтам шкула пĕтернĕ хыççăнах «Сельхозтехникăн» Елчĕкри пĕрлешĕвĕ çумĕнчи механизаторсен шкулне вĕренме кĕнĕ, алла тракторист свидетельствине илнĕ. Ун хыççăнах салтака кайма ячĕ тухнă унăн.
Георгий пиллĕкмĕш класра вĕреннĕ чухнех тракторпа туслашнă. Ашшĕ, Валерий Петрович, комбайнер пулса ĕçлекенскер, ывăлне мĕн пĕчĕкрен ялхуçалăх техники çумне çыпăçтарнă. Çитĕнсе пынă май вăл вырма вăхăтĕнче ашшĕпе пĕрле комбайнера пулăшакан пулса çÿренĕ. Ялти хăш-пĕр ача-пăча каникул вăхăтĕнче пĕве хĕрринче хĕвел питĕнче хĕртĕннĕ вăхăтра ашшĕпе пĕрле плугарь пулса суха тунă е ытти ĕçсене пурнăçлама хутшăннă.
Унăн салтак служби Казахстанри Байконур космодромра иртет. Салтак тивĕçĕсене тÿрĕ кăмăлпа пурнăçланăшăн ăна çар командованийĕ темиçе хутчен те Хисеп грамоти парса хавхалантарнă.
Салтак тивĕçне чыслăн пурнăçланă Георгий Парамонов 1990 çулхи август уйăхĕнче тăван яла таврăнать. Ĕнерхи салтака хуçалăхра хапăл туса кĕтсе илеççĕ, ăна ДТ-75 трактор шанса параççĕ, каярахпа МТЗ-80 урапаллă тракторпа ĕçлет. Унтанпа 26 çул иртсе кайнă пулин те вăл хăйĕн юратнă ĕçне урăх улăштарман.Çак тапхăрта лару-тăрăва кура тĕрлĕ çĕрте ĕçлеме тÿр килнĕ пулин те, механизатор ĕçĕнчен уйрăлман. Каярахпа «Мир» колхозра тракторист, комбайнер пулса вăй хунă. Комбайнерсем хушшинчи ăмăртура мала тухнăшăн, çĕртме сухине агротехника йĕркине пăхăнса пысăк пахалăхпа пурнăçлама пултарнăшăн ăна нумай хутчен укçан преми, Хисеп грамоти, алла çыхмалли сехет парса хавхалантарнă. Хăвăлçырмапа Кÿлпуç ялĕсене пĕрлештерсе тăнă «Мир» ЯХПК саланса кайнă хыççăн канăçа пĕлменскер, «Эмметево», «Урожай» ОООсенче комбайнер-тракторист пулса ĕçлерĕ. Ăçта вăй хурсан та ĕçе тĕплĕн пурнăçлама хăнăхнă сăпайлă çын ертÿçĕсемпе пĕрле тăрăшакан юлташĕсен хисепне тивĕçнĕ.
Шăпах 8 çул каялла, 2008 çулхи октябрь уйăхĕнче «Мир» хуçалăх никĕсĕ çинче «Слава картофелю» агрофирма» ОООн Елчĕк районĕнчи предприятийĕ - «АСК-Яльчики» ООО йĕркеленсен Юрий Галкин ĕç тăвакан директор Георгий Парамонова кунти ялхуçалăх предприятине ĕçлеме чĕннĕ. Ăна Т-150 трактор уйăрса параççĕ. Юлашки çулсенче Георгий Валерьевич СШАра туса кăларнă çĕрулми пухса кĕртекен «Джон - Дир» комбайна тухăçлă ĕçлеттерет. Агрофирма ертÿçисен шанăçне тивĕçлипе тÿрре кăларакан механизатора 2015 çулхи çураки кăтартăвĕсем тăрăх район администрацийĕн, нумаях пулмасть Чăваш Республикин Ялхуçалăх министерствин Хисеп грамотисене парса чыс тунă.
Килте вĕсем амăшĕпе иккĕшех пурăнаççĕ. Елена Сергеевна тивĕçлĕ канăва тухни чылай пулать. Хăй вăхăтĕнче вăл «Мир» колхозри фермăра сысна пăхакан, каярахпа нумай çул ферма заведующийĕ пулса тăрăшнă. Пархатарлă ĕçĕшĕн ăна «Хисеп Палли» орденпа наградăланă, тата ытти нумай ят-сума та тивĕçлĕ пулнă.
Парамоновсем кирпĕчрен хăпартнă кермен пек çуртра пурăнаççĕ. Гаражра - çăмăл автомашина, картиш тулли чăх-чĕп, хур-кăвакал, сурăхсем, кроликсем ĕрчетеççĕ. Пахчара çимĕç паракан тĕрлĕ йывăçсем çитĕнеççĕ. Апла пулсан, Георгий Парамонов агрофирмăри тăрăшуллă ĕçчен анчах мар, çирĕп хуçалăх çынни те.
Владислав САЗОНОВ-ПИНЕР.