15 октября 2016 г.
Районăн социаллă пурнăçĕпе экономика аталанăвĕнче асфальт çулсем сарни пĕлтерĕшлĕ вырăн йышăнать. Çакна шута илсе Елчĕк район администрацийĕ транспорт инфраструктурине аталантарассипе кашни çул курăмлă ĕçсем туса ирттерет.
Кăçал Мучар тата Тĕмер ялĕсем хушшинчи 1,1 çухрăм инçĕшĕнчи çула пурĕ 11 миллион та 779 пин тенкĕлĕх асфальт сарма тĕллев илни те пурнăçа кĕрет. Çак пысăк ĕçе пурнăçлама хамăр районти çул-йĕр хуçалăхĕн ĕçченĕсем - Вячеслав Сядуков ертсе пыракан «ДПМК» «Яльчикское» ООО коллективĕ тивĕçлĕ пулнă. Çавна май çул-йĕр хуçалăхĕнче тăрăшакансем хăйсен професси уявне хĕрÿ ĕçре кĕтсе илеççĕ. Мĕншĕн тесен вĕсен вăхăта вăраха ямасăр, çанталăк сивĕтиччен çула асфальт сарма ĕлкĕрмелле.
Кĕске вăхăт хушшинче кунта пысăк ĕç пурнăçлама пултарнине хамăр курса ĕнентĕмĕр. Геннадий Зайцев мастер лару-тăрупа тĕплĕнрех паллаштарчĕ. Туслă коллективра тăрăшакансем пурте пĕр çын пек пулса шутлă кунсенче çула тикĕслесе хăйăр, вак чул сарнă, шыв-шур çула сиенлесрен асăрханса бетонран тунă шыв юххисем, вырнаçтарнă, çул айккипе ÿсекен кирлĕ мар йывăç-тĕмсенчен хăтăлнă.
- Çула битум сапнă хыççăн паян-ыранах асфальт сарма тытăнатпăр, - терĕ Геннадий Григорьевич.
«ДПМК» «Яльчикское» коллективĕнче тăрăшакансемпе уйрăммăн паллашма та кăмăллă пулчĕ. Вĕсем: Анатолий Мохов, Владимир Мальцев, Павел Морозов водительсем, Петр Карсаков, Николай Гурьянов экскаваторщиксем, погрузчикпа ĕçлекен Аркадий Щипцов, Надежда Синева, Петр Шепилов, Елена Кошкина рабочисем... Ял çыннисене тикĕс çулпа тивĕçтерекенсен малашнехи ĕçĕсем те ăнса пыччăр.
Светлана АРХИПОВА.
Сăнÿкерчĕкре: Надежда Синева, Петр Шепилов, Елена Кошкина рабочисем куллен яваплă ĕçе хутшăнаççĕ