15 октября 2016 г.
Кĕрхи çанталăкăн ăсне пĕлеймĕн çав. Авăн уйăхĕнче чарăнма пĕлмесĕр тенĕ пек çумăр çунăран кĕркуннехи уй-хир ĕçĕсене пурнăçласси кая юлчĕ. Республикăри аграрисем çĕрулми пухса кĕртессинче те пысăк йывăрлăхсемпе тĕл пулчĕç. Чăваш Республикин Пуçлăхĕ Михаил Игнатьев ял çыннисене: «Иккĕмĕш çăкăра» çăлса хăвармаллах!» - тесе чĕнсе калани те ытахальтен каланă сăмах мар.
Республикăри районсенчи бюджет учрежденийĕсенче тăрăшакансемпе вăй-хал пур çынсем пурте юлашки кунсенчи уяр çанталăкпа усă курса çĕрулми туса илекен ялхуçалăх предприятийĕсемпе хресчен /фермер/ хуçалăхĕсене пулăшма кар тăнă.
Пирĕн районти ялхуçалăх предприятийĕсемпе хресчен /фермер/ хуçалăхĕсем юпа уйăхĕн 13-мĕшĕ тĕлне çĕрулми кăларассине вĕçленĕ.
Çĕрулми пухса кĕртес ĕçре пирĕн районти лару-тăру та çăмăл пулмарĕ. Ăна кăçал пурĕ 672 гектар, çав шутран «АСК-Яльчики» ОООра - 220, «Нива» агрофирма» ОООра - 100, «Клевер» ОООра - 35, хресчен /фермер/ хуçалăхĕсенче 317 гектар лаптăкра çитĕнтернĕ пулнă. Районти çĕр ĕçченĕсем кĕр мăнтăрĕпе пулнă пысăк пуянлăха çăлса хăварассишĕн уяр кунсемпе туллин усă курни ĕçе тухăçлă йĕркелесе пыма тата çĕрулмине тăкаксăр пухса кĕртме май пачĕ. Йывăрлăх хыçа юлчĕ.
Светлана АРХИПОВА.