15 октября 2016 г.
Призыв пуçланнă
Çĕршывра октябрĕн 1-мĕшĕнче кĕрхи призыв пуçланчĕ.
Декабрĕн 31-мĕшĕччен Раççей Федерацийĕн çарĕсене служба тивĕçĕсене пурнăçлама 152 пин çын каяссине палăртнă. Чăваш Енрен 1552, çав шутран Елчĕк тăрăхĕнчен 44 çамрăк салтак атти тăхăнĕ.
Пирĕн каччăсем Раççей Федерацийĕн Хĕç-пăшаллă вăйĕсен пур тĕрлĕ çарĕсенче те службăра тăрĕç. Çавăн пекех спецназ, РВСК, Президент полкĕнче те Елчĕксем пулĕç.
Октябрĕн 6, 7, 10-мĕшĕсенче район администрацийĕн пуçлăхĕн тивĕçĕсене пурнăçлакан Л.Левый ертсе пынипе призыв комиссийĕ ĕçлерĕ. Вăл çамрăксем çар ретне тăма хатĕр пулнине палăртрĕ. Октябрь уйăхĕн вĕçĕнче призывниксем çара кайма пуçлаççĕ.
А.КАРЛИН.
Таса çăлкуç - сывлăх тĕрекĕ
Çирĕклĕ Шăхаль ял тăрăхĕнче çынсене ĕçмелли таса шывпа тивĕçтересси, çакна шута илсе çăлкуçсене тирпейлесе тăрасси çине пысăк тимлĕх уйăраççĕ.
Тĕмер ял тăрăхĕн депутачĕ Н.Матросова пуçарнипе ял çыннисем иртнĕ кунсенче кунти çăлкуç территорине тирпей-илем кĕртнĕ.
Сăмах май, хальхи вăхăтра Çирĕклĕ Шăхаль ял тăрăхĕнче 4 çăлкуç шутланать. Ял çыннисем çулталăк тăршшĕпех вĕсенчи сиплĕ те таса шывпа усă кураççĕ.
Виталий Марков - пĕрремĕш
«Физкультурăпа сывлăх тата спорт ĕçĕн маçтăрĕ» ята çĕнсе илессишĕн Раççей шайĕнчи конкурсăн республикăри тапхăрне пĕтĕмлетнĕ.
Унта хутшăннă Елчĕкри А.В.Игнатьев ячĕллĕ ачасемпе çамрăксен спорт шкулĕн тренерĕ Виталий Марков пĕтĕм тĕрĕслев витĕр ăнăçлă тухса пĕрремĕш вырăна çĕнсе илме пултарнă. Ĕçтешĕсем ăна тивĕçлĕ çĕнтерÿ тунă ятпа саламланă.
Çын ĕçпе илемлĕ
Чăваш Республикинчи Ĕç çыннин çулталăкĕнче Лаш Таяпа ял тăрăхĕнче ĕç çыннине хисеплесе тĕрлĕрен мероприятисем нумай йĕркелесе ирттереççĕ.
Эльвира Михеева библиотекарь иртнĕ кунсенче Лаш Таяпари шкулта тăххăрмĕш класра вĕренекенсемпе тĕл пулнă. Пурнăç çулĕ çине тухма хатĕрленекен арçын ачасемпе хĕрачасем хальхинче республика, район шайĕнче ĕçлесе пурăнакан тĕрлĕ професси çыннисем, ĕçпе ят-сума тивĕçлĕ пулнă ялти çынсем пирки сăмах пуçарнă.
Савелий, Арина... ятсене килĕштереççĕ
Район администрацийĕн ЗАГС пайĕ 9 уйăхра 82 ача çуралнине, 62 çĕнĕ çемье чăмăртаннине, 25 çемье уйрăлнине çирĕплетнĕ.
Ашшĕ-амăшĕсенчен ытларахăшĕ хăйсен пепкисене мĕнле ят хунă тетĕр; Вĕсем суйласа илнĕ чи юратнă ятсем Савелий, Александр, Арсений, Арина, Камилла, Алиса пулнă.