15 октября 2016 г.
Кĕçнерникун Елчĕк районĕнче пурăнакансем те Пĕтĕм Раççейри «Симĕс Раççей - ман ĕмĕт çĕршывĕ» экологи субботникне активлă хутшăннă.
Ăна граждансене хăйсем пурăнакан тăрăха кил-çуртра пухăнакан ăпăр-тапăртан тасатма явăçтарас, халăх пурăнакан вырăнсене тирпей-илем кĕртес, çамрăксене экологи воспитанийĕ парас тĕллевпе йĕркеленĕ.
Район администрацийĕнче ĕçлекенсем экологи субботникне пуринчен малтан тухнă, хăйсене çирĕплетсе панă çĕр лаптăкĕсене ăпăр-тапăртан тасатнă. Çак кун вĕсем Тĕп лапамра, Иванов урамĕнче тăкăннă çулçăсене, тасамарлăха пуçтарнă, клумбăсемпе газонсене йĕркене кĕртнĕ.