15 октября 2016 г.
Иоаким Максимов-Кошкинский
Чăваш театрне пуçарса яраканĕ, чăваш фильмĕсене ÿкерекенĕ, режиссер, драматург, ЧАССР халăх артисчĕ. Иван Яковлев ентешĕ. Раççей шайĕнчи фильмсенче вылянă: «Романтики», «Алмазы», «Алитет уходит в горы». Сăмах май каласан, Иоаким Степанович ÿкернĕ картинăсене хăй вăхăтĕнче чикĕ леш енче те хапăлласа йышăннă.
Тани Юн
И.С.Максимов-Кошкинский мăшăрĕ. Чăвашсен пĕрремĕш киноактриси. Раççей шайĕнчи ĕçĕ: «Волжские бунтари».
Станислав Садальский
Чăваш Ен, Раççей тава тивĕçлĕ артисчĕ, Грузи халăх артисчĕ. Вăл Патăрьел районĕнчи Шăнкăртам ялĕнче учительсен çемйинче 1951 çулта çуралнă. ГИТИСа вĕренме кĕриччен Ярославль хулинчи мотор заводĕнче ĕçленĕ, драма кружокне çÿренĕ. Чылай фильмра вылянă: «Город первой любви», «Место встречи изменить нельзя», «О бедном гусаре замолвите слово», «Вокзал для двоих», «Убойная сила» тата ытти те.
Михаил Ефремов
РФ халăх артисчĕ нихăçан та хăйĕнче чăваш юнĕ чупнине пытармасть. Вăл - чăвашсене çутта кăлараканĕн Иван Яковлевăн мăнукĕн ачи. 1963 çулта Мускавра çуралнă. Чи паллă ĕçĕсем: «Когда я стану великаном», «Виват, гардемарины», «Королева Марго», «Офицеры», «Московская сага», «Антикиллер», «Граница. Таежный роман» тата ытти те.
Александр Хван
1957 çулта Шупашкарта çуралнă. 1980 çулта ВГИКăн режиссер факультетĕнчен вĕренсе тухнă. Хван ÿкернĕ чи паллă фильмсем: «Шнур», «Дюба-Дюба», «Кармен» тата ытти те. Александр хăйне актер ĕçĕнче те тĕрĕслесе пăхнă: «Мания Жизели» фильмра вылянă.
Надежда Павлова
Балет çăлтăрĕ 1956 çулта Шупашкарта çуралнă. СССР, РСФСР, ЧАССР халăх артистки Надежда Павлова ташши «Асаф Мессер», «Дочери Отчизны», «Дон Кихот» балет телеверсийĕнче, «Поэмы» балет - фильмра сăнланнă. Артисткăна халалланă кинолентăсем: «Танцует Надя Павлова», «Джульетта», «Дуэт молодых», «Надежда Павлова».
Лариса Павлова
Шупашкар пики 1988 çулта Никита Хубовăн «Роковая ошибка» фильмĕнче вылянă. Шел, Ларисăн çăлтăрĕ нумаях çиçмен, чап тутипе киленме пÿрмен ăна.
Андрей Градов
Раççей тава тивĕçлĕ артисчĕ 1954 çулта Мускавра çуралнă. Петр Градов поэт ывăлĕ. И.С.Максимов-Кошкинскипе Тани Юн мăнукĕ. Чылай фильмра ÿкерĕннĕ: «Побег из тюрьмы», «Одинокий голос человека», «Место встречи изменить нельзя», «Берегите женщин», «Гостья из будущего» тата ытти те.
Л.ЗАЙЦЕВА.