12 октября 2016 г.
Район администрацийĕн пуçлăхĕн тивĕçĕсене пурнăçлакан Леонард Левый райадминистрацин структура подразделенийĕсен, предприятисемпе организацисен ертÿçисемпе, ял тăрăхĕсен пуçлăхĕсемпе канашлу ирттернĕ.
Леонард Левый канашлăва иртнĕ эрнери ырă хыпарсенчен пуçланă. Елчĕкри пĕтĕмĕшле пĕлÿ паракан вăтам шкул Раççейри ялсенчи чи лайăх шкулсен йышне кĕни савăнтарать. Çавăн пекех Патреккел хĕрĕ Анна Гаврилова тĕнче чемпионатĕнче алă вăйĕ виçессипе призерсен йышне кĕни, эрнекун Елчĕкри тĕп стадионта çăмăл атлетсен эстафети иртни те ырă пулăмсем.
Район бюджетне кăçалхи 9 уйăхра пурнăçлани çинчен район администрацийĕн пуçлăхĕн çумĕ - финанс пайĕн ертÿçи Галина Анисимова чарăнса тăнă. Вăл район бюджечĕ тупăш енĕпе 219856,6 пин тенкĕпе, тăкаксем енĕпе 218167,8 пин тенкĕпе танлашнине палăртнă. Профицит - 1688,8 пин тенкĕ. Хамăр патăмăрта пухăннă тупăшсен виçи 54650,3 пин тенкĕ, çав шутран налуксем 47101,8 пин тенкĕ, налуксен йышне кĕмен тупăшсем 7548,5 пин тенкĕ.
Галина Анисимова тупăшсен калăпăшĕ тата та пысăкрах пулма пултарнине палăртрĕ. Акă, коммуналлă пулăшусен техникине арендăна панăшăн илекен тÿлевĕн парăмĕн тÿпи пысăк - 752 пин тенкĕ. Çавăнпа кунпа килĕшсе лармалла мар - парăмсене çывăх вăхăтра пĕтермелле.
Пушар асăрхавĕн тата профилактика ĕçĕн районти уйрăмĕн ертÿçи Александр Сайкин пушартан сыхланмалли мерăсем пирки чарăнса тăнă /вĕсем çинчен «Елчĕк ен» хаçатăн сентябрĕн 28-мĕшĕнчи номерĕнче тĕплĕн çутатнă/.
Канашлура вут-çулăмран сыхланас енĕпе кашни уйрăм хуçалăхрах огнетушительсем питĕ вырăнлă пулни пирки те ыйтăва çĕкленĕ. Тăкакĕ нумаях мар, çапах пысăк инкекрен сыхланма пулатех.
Октябрĕн 4-7-мĕшĕсенче пирĕн çĕршывра гражданла оборона енĕпе Пĕтĕм Раççейри штаб тренировки иртнĕ. Районта иртнĕ мероприятисем çинчен район администрацийĕн ятарлă программисен пайĕн ертÿçин тивĕçĕсене пурнăçлакан Виталий Рыбкин каласа панă.
Район уй-хирĕсенчи ĕç-хĕл пирки район администрацийĕн ялхуçалăх пайĕн ертÿçи Петр Тремасов чарăнса тăнă. Халĕ районти ялхуçалăх предприятийĕсемпе хресчен /фермер/ хуçалăхĕнче кĕрхи ĕçсем вĕçленсе пыраççĕ - çĕрулмине, пахча çимĕçсене юлашки гектарсем çинчен пухса илеççĕ. Кĕрхи çĕртме сухи тăвассине «Комбайн», «Рассвет», «Урожай», «Яманчурино», «Труд» хуçалăхсенче пĕтĕмпех вĕçленĕ. Ытти хуçалăхсенче те çитес çулхи тухăç никĕсĕшĕн кĕрешÿ вĕçленсе пырать.
Петр Тремасов ялхуçалăхĕн тата продукци ĕçлесе хатĕрлекен промышленноç ĕçченĕсен кунне республикăра октябрĕн 28-мĕшĕнче, районта ноябрĕн 3-мĕшĕнче уявлама палăртни çинчен пĕлтернĕ.
Канашлура пурăнмалли çуртсемпе социаллă объектсене хутса ăшăтас, çул-йĕр строительстви тата ытти ыйтусене те тишкернĕ.