12 октября 2016 г.
Иртнĕ шăматкун учительсен кунне Шупашкарта паллă тунă. Пирĕн районти вĕрентекенсем те республика шайĕнчи мероприятие активлă хутшăннă.
Вĕрентекенсене Чăваш Республикин Пуçлăхĕ Михаил Игнатьев, ЧР Патшалăх Канашĕн Председателĕ Валерий Филимонов, ЧР вĕренÿпе çамрăксен политикин министрĕ Юрий Исаев саламланă.
Михаил Игнатьев республикăри педагогсен йышĕнче чăн-чăн профессионал нумаййине, Чăваш Енĕн вĕренÿ тытăмĕнчи çитĕнĕвĕсене çĕршыв шайĕнче палăртнине, 2016 çулта та республикăри шкулсем Раççейре чи лайăххисен шутне кĕнине пĕлтернĕ.
- Çавнашкал çитĕнĕве пĕччен тăрăшса тума çук. Пуçаруллă педагогсем, яваплă ашшĕ-амăшĕ, пĕлÿшĕн чăнласах çунса тăракан вĕренекенсем пĕр команда пулсан кăна çавăн пек кăтарту патне çитме май пур, - тенĕ республика Пуçлăхĕ.
Валерий Филимонов спикер профессире пултарулăхпа палăрса тăракан вĕрентекенсене ЧР Патшалăх Канашĕн Хисеп хутне парса чысланă. Награда илнисен йышĕнче - Çирĕклĕ Шăхалĕнчи Нина Васильева учительница.
Уяв Чăваш Ен педагогĕсен хорĕсен конкурсĕн финалĕпе вĕçленнĕ.