08 октября 2016 г.
Октябрĕн 5-мĕшĕнче РФ çиччĕмĕш суйлаври Патшалăх Думин пĕрремĕш ларăвĕ иртнĕ. Унта Раççей Президенчĕ парламентарисене саламланă.
Президент суйлав кампанийĕ уçă, тÿрĕ тата конкурентлă кĕрешÿре иртнине, унта Раççей обществи хăйĕн шухăшне пĕлтернине палăртнă.
Парламентăн депутачĕсен çурри пĕр мандатлă суйлав округĕсенчен суйланни те çынсем вĕсене шаннине çирĕплетет.
Владимир Путин депутатсене хăйсен йышăнăвĕсене пĕр-пĕринпе килĕштерсе, калаçса йышăнма сĕннĕ. Кунта халăх представителĕсен кăмăллăхĕ пысăк шайра пулмалла. Çитĕнекен ăрăва тивĕçлĕ пĕлÿ тата воспитани парасси - патшалăхăн малашлăхĕ. Çакăн пирки «Единая Россия» партин «Ача сачĕсене - ачасене» проекчĕн ертÿçи, Патшалăх Думин депутачĕ Алена Аршинова çапла палăртнă: «Патшалăх Думин депутачĕсене ырă çул суннă май, Владимир Путин вĕренÿ тĕп вырăн йышăннине палăртрĕ. Вăл çавăн пекех пурнăçа кĕртмелли проектсем пирки те чарăнса тăчĕ. Паллах, вĕсенчен пĕри - вĕренÿ тытăмне пырса тивекенни. Çав шутра 3 çула çитмен ачасем валли садиксенче çĕнĕ вырăнсем йĕркелесси те. Çак проекта 2017 çултан малалла тăсаççĕ. Кăçалтан пурнăçа кĕме тытăннă çĕнĕ программа - çĕнĕ шкулсем тăвасси вăй илет. Шкул автобусĕсене çĕнетессипе, ял шкулĕсенчи спорт залĕсене, студентсен общежитийĕсене юсассипе, бассейнсем тăвассипе çыхăннă программăсем те малалла тăсăлмалла».
«Çак программăсене сыхласа хăварни çеç мар, вĕсене анлăлатни те кирлĕ», - пĕлтернĕ Алена Аршинова.
«Президент йышăнакан саккунсен малашлăхĕн тĕп çул-йĕрĕсене те палăртрĕ. Патшалăх Думинче предпринимательлĕхе аталантармалли саккунсен проекчĕсене тишкерĕç. Вĕренÿ, сывлăх сыхлавĕн, çурт-йĕр политикин, экологин, урăхла каласан, çынсен ырлăх-сывлăхĕпе çыхăннă тытăмри тĕллевсем те тимлĕхре пулĕç. Çак ĕçре «Единая Россия» партин Чăваш Енрен суйланнă депутачĕсем паллă вырăн йышăнаççĕ», - тесе пĕлтернĕ Патшалăх Думин депутачĕ Леонид Черкесов.