08 октября 2016 г.
Юпа уйăхĕн 4-мĕшĕнче пирĕн çĕршывра граждан оборони енĕпе Пĕтĕм Раççейри штаб тренировки пуçланнă. Виçĕ тапхăрпа иртекен вĕренĕве Чăваш Ен те, çав шутра пирĕн район та, хутшăннă.
Уйăхлăхăн тĕп тĕллевĕ - граждан оборонин ертÿçисен практика ăсталăхне ÿстересси, тĕрлĕ служба-ведомствăн пысăк калăпăшлă синкерĕсене сирме пултарас хатĕрлĕхне тĕрĕслесси. Чăваш Республикинче юпа уйăхĕн 4-мĕшĕнче 6 сехетре тренировка иртнĕ: граждан оборонин республика, муниципалитет тата объектсен шайĕсенчи ертÿçисен тытăмĕн пухăвĕ иртнĕ. ЧР Министрсен Кабинечĕн Председателĕ Иван Моторин сценари планĕнчи пĕтĕм мероприятие вăхăтра тата пахалăхлă ирттермеллине пĕлтернĕ. Вĕренĕвĕн иккĕмĕшпе виççĕмĕш тапхăрĕсенче специалистсем хÿтĕлев хатĕрĕсене паракан тата эвакуаци пункчĕсем, радиаци, хими тата биологи сăнавĕсен посчĕсем, апатлану тата япалапа тивĕçтерекен куçса çÿрекен пунктсем йĕркеленĕ. Çав хушăрах васкавлă службăсен техноген синкерĕн сиенне пĕтерес енĕпе хăйсем мĕн тума пултарнине, çăлавçăсен аэромобиль ушкăнĕ хăйĕн ĕç-хĕлне хирти условисенче кăтартса панă.
Елчĕкри аварипе çăлав служби Елчĕк шкулĕнчи пуçламăш классем вĕренекен çуртра практика мероприятийĕ ирттернĕ. Кунта пушара хирĕç кĕрешекен, йĕркене сыхлакан, ГИБДД, медицина, газ тата энергоснабжени службисем хăйсен умне лартнă задачăсене тĕплĕн пурнăçланă.
Пĕтĕм Раççейри вĕренÿ вăхăтĕнче МЧС сотрудникĕсем вĕренÿ учрежденийĕсенче ОБЖ уçă урокĕсене ирттернĕ.
Кушкă шкулĕ. Граждан оборонин уйăхлăхне хутшăнса вĕренекенсемпе шкулта ĕçлекенсем хушшинче тренировка занятийĕ иртнĕ.
8 сехет те 30 минутра шкулта «пушар тухнине» систернĕ, пурин те вĕренÿ тата ĕç вырăнĕсенчен тухса каймалла. Команда парсанах пурте тĕп тата запас алăкĕсенчен шкултан тухса кайнă. Нимĕнле тĕркешÿ те пулман. 1 минут та 35 çеккунтра шкулта никам та юлман. Инкек-синкек сиксе тухас пулсан ачасем хăйсене мĕнле тытмаллине лайăх пĕлеççĕ.
Курнавăш шкулĕ. Уйăхлăха хутшăнса шкулта ОБЖ предмечĕпе уçă уроксем иртнĕ.
Пурнăç хăрушсăрлăхĕсен урокĕсене тĕрлĕ мелсемпе йĕркеленĕ. Пĕчĕккисемпе вăйăсем вылянă пулсан, аслисем пĕрремĕш пулăшу памалли йĕркесене, пушар хăрушсăрлăх, çул-йĕр правилисене мĕнле пĕлнине практикăра кăтартса панă. Çăлавçăсен профессийĕ пирки калаçнă класс сехечĕсем кашни ачана интереслентернĕ. Çăлавçăсен çăмăл мар профессийĕпе паллашнă май хăйсен пĕлĕвне викторинăра тĕрĕсленĕ.