05 октября 2016 г.
Тунтикун район администрацийĕн пуçлăхĕн тивĕçĕсене пурнăçлакан Леонард Левый райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Капиталлă строительство тата пурăнмалли çурт-йĕрпе коммуналлă хуçалăх пайĕн начальникĕ Николай Петров районта хутса ăшăтмалли сезон пуçланни çинчен каласа пачĕ. Сентябрĕн 30-мĕшĕ тĕлне патшалăх, муниципалитет организацийĕсемпе учрежденийĕсенчи 81 котельнăйран 67-шĕнче газпа хутса ăшăтма тытăннă. Шкулсен тата шкулчченхи учрежденисене иртнĕ эрнерех хутса ăшăтаççĕ. Леонард Левый палăртнă тăрăх, котельнăйсене ĕçе хатĕрлеме, унти приборсен юсавлăхне çуллах тĕрĕслеме панă, ытти документсене вăхăтра хатĕрлеме тытăннă шкулсенче ачасене ăшăра вĕрентеççĕ, организацисенчи çынсем ăшăра ĕçлеççĕ, çынсене йышăнаççĕ, мероприятисем йĕркелеççĕ.
Сентябрĕн 30-мĕшĕнче тата октябрĕн 1-мĕшĕнче районта ватă çынсене чыслас мероприятисем иртнĕ. Халăха социаллă пулăшу паракан пай начальникĕ Ирина Аникина каланă тăрăх, вĕсене чыслама ял тăрăхĕсен пуçлăхĕсем, депутатсем, вĕренÿ, культура работникĕсем, шкул ачисем хутшăннă. Анчах ĕлĕкхи колхозсен никĕсĕ çинче йĕркеленнĕ сахал яваплă обществăсен, хресчен ?фермер/ хуçалăхĕсен, производство кооперативĕсен хăш-пĕр ертÿçисем вĕсем халĕ хуçалла усă куракан куçман пурлăха, инфратытăма паянхи ватă çынсен вăйĕпе, укçи-тенкипе тунине манаççĕ. Çакна асра тытакан, ватă çынсене хисеплекен, аслă ăрури çынсене уяв ячĕпе саламлакан, пĕр-пĕр пĕчĕк парнепе, ăшă сăмахпа савăнтаракан ертÿ-çĕсем сахал пулнă.
Ялхуçалăх пайĕн начальникĕ Петр Тремасов пĕлтернĕ тăрăх, районта кĕрхи çĕртме сухи тумалли плана 89 процент тултарнă, сухаламалли тата 2400 гектар юлнă. Çакă кăна-ши, ялхуçалăх предприятийĕсем цифрăсене ÿстерсе кăтартмаççĕ-ши? Çакăн пек шухăш та пулчĕ канашлура. «Рассвет» ЯХПКра, «Урожай», «Яманчурино» ОООсенче суха ĕçне вĕçленĕ. Районта çĕрулми кăлармалли, кукурузăна силоса хывмалли лаптăксем те пур-ха. Вĕсем пысăках мар пек курăнаççĕ. Анчах йĕпе-сапаллă çанталăк ĕçре пысăк чăрмав кÿрет.
Леонард Левый иртнĕ эрнере пулса иртнĕ пулăмсенчен чи палли Чăваш Республикин Патшалăх Канашĕн улттăмĕш суйлаври пĕрремĕш сессийĕ, унта Патшалăх Канашĕн Председательне пирĕн ентеше Валерий Николаевич Филимонова суйлани пулнине палăртрĕ. Октябрĕн 1-мĕшĕнче пирĕн паллă ентеше - композитора, поэта Николай Карлина Шупашкарти Я.Ухсай ячĕллĕ Культура керменĕнче чысланă. Унта район администрацийĕн пуçлăхĕн пĕрремĕш çумĕ Леонард Левый, Аслă Елчĕк ял тăрăхĕн пуçлăхĕ Валерий Афанасьев, Патреккелти халăх хорĕн çамрăк участникĕсем хутшăннă. Иртнĕ эрнерех республикăри призыв комиссийĕн пĕрремĕш ларăвĕ пулнă. Кĕркунне пирĕн районтан 40 çамрăк çара каймалла. Районта призыв комиссийĕ октябрĕн 6, 7, 10-мĕшĕсенче ĕçлĕ. Çавăн пекех гражданла оборонăн уйăхлăхĕн /октябрĕн 3-мĕшĕ-ноябрĕн 3-мĕшĕ/ вăхăтĕнче - октябрĕн 4-6-мĕшĕсенче районта командăпа штаб вĕренĕвĕ иртет. Леонард Левый çак икĕ мероприятие те ял тăрăхĕсен пуçлăхĕсене, ятарлă службăсен ертÿçисене активлă хутшăнма чĕнсе каларĕ.
Пурлăх, çĕр, транспорт налукĕсене кăçал ноябрĕн 1-мĕшĕччен тÿлесе татмалла. Район администрацийĕн пуçлăхĕн çумĕ - финанс пайĕн начальникĕ Галина Анисимова парăмсемпе вăхăтра татăлмаллине аса илтерчĕ.