05 октября 2016 г.
Çамрăксене -пулас пенси çинчен
Елчĕкри вăтам шкулта вунпĕрмĕш класра вĕренекенсемпе пулас пенси çинчен урок ирттернĕ.
Унта пенси тытăмĕпе, пулас пенсие мĕнле йĕркелемелли майсемпе паллаштарнă. Çавăн пекех вĕренекенсен «Личный кабинет гражданина» уйрăмпа электрон пулăшăвĕ илмелли майсемпе усă курма вĕрентнĕ. Кашни ачанах Раççей Пенси фончĕ кăларнă кĕнекене парнеленĕ.
Çулталăк вĕçлениччен кашни шкулта Раççей Пенси фончĕн районти пайĕн специалисчĕсем пулса обществознани предметне вĕрентекенсемпе пĕрле уроксем ирттерĕç.
Çакнашкал вĕренÿ кăçал улттăмĕш çул иртет. Çав вăхăтра Чăваш Республикинче 2,5 пин ытла факультатив урокĕсемпе лекцисем иртнĕ, вĕсенче пенси саккунĕсен никĕсĕсемпе 54 пин вĕренекен паллашнă.
З.ЯКОВЛЕВА,
Раççей Пенси фончĕн Елчĕк районĕнчи пайĕн ертÿçи.
ГАИ музейĕ чĕнет
«Полици тата ачасем» акци вăхăтĕнче ГИБДД ĕçченĕсем Патшалăх автоинспекцийĕн Шупашкарти çуртĕнче вырнаçнă ГАИ музейне пырса курма чĕнеççĕ.
ГИБДД управленийĕнче ГАИ музейне 1996 çулхи август уйăхĕнче уçнă. Ăна Чăваш Енĕн ГАИ службин ертÿçи пулса 25 çула яхăн ĕçленĕ П.Меркушев йĕркеленĕ. Музейра Патшалăх автоинспекцине йĕркеленĕ вăхăтра пуçласа паянхи кунчченхи ĕç-хĕлне сăнлакан экспонатсем вырнаçнă. Вĕсемпе ĕç кунĕсенче паллашма май пур.
А.АДЮКОВ.
Хорсем юрлаççĕ
Чăваш Республикин, Раççей Федерацийĕн культурăн тава тивĕçлĕ ĕçченĕ Геннадий Борисов тата «Елчĕк районĕнчи централизациленĕ клуб тытăмĕ» культурăн муниципаллă бюджет учрежденийĕн пултарулăх руководителĕ Иван Шурбин ертсе пыракан Патреккелти халăх, районти ветерансен «Туслăх» хорĕсем Чăваш Республикинчи Ĕç çыннин çулталăкне халалласа «Хавхаланса юрлать чĕре!» ятпа иртнĕ республикăри юрлакан коллективсен зонăри фестивальне хутшăннă.
Комисси членĕсемпе нумай куракан Елчĕк районĕнчи хор коллективĕсен пултарулăхне тивĕçлĕ хак панă. «Туслăх» коллектив куракансене чăваш халăхĕн авалхи юрри-кĕввипе тыткăнлама пултарнă, «Кĕреке юрри», «Атăл хăмăшĕ» юрăсене ĕненмелле, чун-чĕрене уçмалла кăтартса пама пĕлнĕ пулсан, Патреккелсем куракансене чăваш-вырăс юррисемпе, «Туйра» акапеллăпа савăнтарнă.