05 октября 2016 г.
Октябрь уйăхĕн 1-мĕшĕнче Шупашкарти Я.Ухсай ячĕллĕ культура керменĕнче паллă композиторăн Николай Карлинăн тата Юрий Сементер поэтăн пултарулăх концерчĕ иртрĕ.
Уява Николай Карлинăн 70 çулхи юбилейне халалланă. Ăна Чăваш наци конгресĕ, Елчĕк ен ентешлĕхĕ, Чăваш наци библиотеки йĕркелерĕç.
Аслă Елчĕкре çуралса ÿснĕ композитора пĕлмен çын Чăваш Енре çук та пулĕ. Хăйĕн пурнăçне Николай Карлин пĕтĕмпех юрă-кĕвве халалланă. Хор дирижерĕ пулма вĕреннĕскер, тăван республикăра миçе хор йĕркелемен-ши вăл? Ку çеç мар, Самар облаçĕнчи Сергиевск районĕнчи Хурамал Этелек ялĕнче «Асамат» халăх хорне те йĕркелесе ярса ертсе пырать.
Чăваш Республикинчи композиторсен ассоциацийĕн, Раççей тата Чăваш писателĕсен союзĕн членĕн, Чăваш Республикин культурăн тава тивĕçлĕ ĕçченĕн Николай Карлинăн юррисене чăвашсем юратса юрлаççĕ. Унăн «Шурă хурăн», «Çичĕ чÿрече», «Юр тăкăнать», «Вуникĕ чĕкеç те» тата ытти юррисене кашни чăваш килĕштерет.
Композиторăн пултарулăх каçне Чăваш Республикин культура министрĕн пĕрремĕш çумĕ Вячеслав Оринов, ЧНК президенчĕн пĕрремĕш çумĕ Валерий Клементьев, Самар тата Чĕмпĕр тăрăхĕсенчи чăваш наципе культура автономийĕсен членĕсем, çавăн пекех район гимнĕн Николай Карлинăн ентешĕсем - район администрацийĕн пуçлăхĕн пĕрремĕш çумĕ Леонард Левый, Аслă Елчĕк ял тăрăхĕн пуçлăхĕ Валерий Афанасьев, Галина Карсакова, Петр Сидоров тата Елчĕк ен ентешлĕхĕн сумлă хăнисем хутшăнчĕç, тав сăмахĕсем каларĕç.
Пултарулăх каçĕнче нумай юрă-кĕвĕ янăрарĕ. Композиторăн юррисене Морис Яклашкин ертсе пыракан Чăваш патшалăх академи симфони капелли, Патреккелĕнчи Геннадий Борисов ертсе пыракан ача-пăча хорĕ, Иванпа Вячеслав Христофоровсем, Тамара Гурьева, Зоя Лисицина, Марта тата ытти юрăçсем шăрантарчĕç.
Юрий Сементер маларах 75 çул тултарнăччĕ. Паллă композиторпа сăвăçăн пултарулăх каçĕнче вĕсене малашне те çĕнĕ сăвă-юрăпа савăнтарма сунчĕç.
А.ФЕДОРОВ.