05 октября 2016 г.
Çурла уйăхĕн 27-мĕшĕнчен пуçласа авăн уйăхĕн 24-мĕшĕччен Раççейри хуласемпе регионсенче кашни çул «Симĕс Раççей» ятпа экологи субботникĕ иртет.
Кĕçĕн Таяпа ял тăрăхĕнче пурăнакансем экологи юхăмне кашни хутĕнче хастар хутшăнаççĕ. Хальхинче те вĕсем хăйсен тĕслĕхлĕ ĕçĕпе палăрчĕç. Вырăнти ял тăрăхĕн специалисчĕсемпе культура тытăмĕнче вăй хуракансем Кĕçĕн Патреккел ялĕ çывăхĕнчи таса çăлкуç çывăхне тата çырма-çатра таврашне тĕрлĕрен йывăç хунавĕсем лартса хăварчĕç.
«Симĕс Раççей» акци - çынсене тăван тавралăха сыхлама, ăна тата илемлĕрех тăвас ĕçе хутшăнма чĕнсе калакан мероприяти.
- Малашне тата ытларах пуçаруллă пуласчĕ, - теççĕ Кĕçĕн Таяпа ял тăрăхĕнчи çутçанталăк тусĕсем.
Сăнÿкерчĕкре: экологи субботникне хутшăннă ял çыннисем.