05 октября 2016 г.
Çанталăк мĕнле пулнине пăхмасăр кашни çул тухăçлă тыр-пул пухса кĕртекен «Комбайн» ялхуçалăх производство кооперативĕнче выльăх апачлĕх культурăсене туса илесси çине те пысăк тимлĕх уйăраççĕ. Çакна кура кунта выльăх-чĕрлĕхе çулталăк тăршшĕпех пахалăхлă апатпа ытлăн-çитлĕн тăрантарма майсем пур.
2016-2017 çулхи хĕл тапхăрĕнче фермăсенчи лару-тăру мĕнле пуласса тĕплĕнрех уçăмлатас тĕллевпе ялхуçалăх предприятийĕнчи тĕп специалистсемпе заведующисем, Гурий Федоров ертсе пынипе, нумаях пулмасть мĕнпур фермăна çитсе курнă. Пĕтĕм çĕрте йĕрке хуçаланни куç умĕнче. Выльăх-чĕрлĕх витисем вырнаçнă виçĕ бригадăри территорие те карта тытса çавăрнă. Яваплă тапхăра кĕтсе илме вара çу уйăхĕсенченех тытăннă. Фермăсенчи тĕп технологи ĕçĕсене - выльăхсене шывпа, апатпа тивĕçтерессине, тислĕке тасатассине механизаци вăйĕпе пурнăçлакан фермăсенчи витесене дезинфекци тунă, шуратнă, урайсене улăштарнă. Микроклимата тивĕçлĕ шайра тытас тĕллевпе мĕнпур производство объектĕнче вентиляци системисем вырнаçтарнă. Сивĕ хĕл кунĕсенче выльăх-чĕрлĕхе тăрантарма пахалăхлă утăпа сенаж, тĕш тырă çăнăхĕ кирлĕ таран хатĕрлесе хăварнисĕр пуçне рационран ытти тутлăхлă тата минераллă хушма апатсем - жом, жмых, урпа хывăхĕ, пурă татăлса курман.
Республикăра Африка чумине тупса палăртнă хыççăн ветеринарипе санитари йĕркипе килĕшÿллĕн иккĕмĕш комплекслă бригадăри сысна ферминче ĕçлекенсем карантин йĕркине çирĕп пурнăçланă. Сысна пăхакансем хальхи вăхăтра та фермăна пырсан та, ĕçрен кайнă чухне те душран çăвăнса тухаççĕ.
Малтанхи кивĕ витесене çĕнĕ условисенче ĕçлеме хатĕрлесси çине кунта юлашки çулсенче уйрăмах пысăк тимлĕх уйăраççĕ. Пĕрремĕш комплекслă бригадăри мăйракаллă шултăра выльăхсен ферминчи пăру витине тĕпрен реконструкци тунă хыççăн кунта ĕçлекенсен ĕç условийĕ, малтанхипе танлаштарсан, нумай ансатрах. Микроклимата тытса пырасси лайăхланнă, çавна май ĕне выльăхсенчен продукци туса илесси ÿсет. Унсăр пуçне, фермăсен территорийĕсене хăтлăх, тирпей-илем кÿресси çирĕп йĕркене кĕнĕ.
Фермăсене хĕле мĕнле хатĕрленнине тĕрĕслесе хак паракан вырăнти комисси пĕрремĕш комплекслă бригадăри Мария Осипова ертсе пыракан ферма чи лайăххи тесе палăртнă. Çак ята коллектив пĕрлехи вăйпа тăрăшса ĕçленипе тивĕçнĕ. Мария Перцева, Надежда Васильева, Людмила Васильева, Альбина Абрамова, Ирина Абрамова, Раиса Степанова тата ытти выльăх-чĕрлĕх пăхакансем кашни кунхи ĕçре хăйсен тивĕçлĕ тÿпине хываççĕ.