01 октября 2016 г.
Уяв ячĕпе ирхи кĕлĕ, концерт
Сентябрĕн 27-мĕшĕнче Тĕмерсем Турă хĕресне çĕклесе кăтартнин ячĕллĕ чиркÿ праçникне паллă тунă.
Çак кун Петр Иванов протоиерей ирттернĕ ирхи кĕлле Тĕмерсем кăна мар, чиркÿ прихутне кĕрекен ытти ялсенче пурăнакансем те йышлă пуçтарăннă. Тĕмер чиркĕвĕ - республикăра чи ватă чиркÿсенчен пĕри. Ялти пĕрремĕш чиркĕве 1749 çулта уçнă, иккĕмĕшне 1790 çулта, хальхине 1876 çулта туса лартнă. Кăçал вăл 267 çул тултарчĕ. Çак тапхăрта чиркÿ хупăнман. 1940-1943 çулсенче çеç унта вăхăтлăха служба иртмен.
Чиркÿ /вăлах ял праçникĕ те/ уявĕнче ял çыннисем хăнасене йыхравланă. Каçхине культура çуртĕнче Фарида юрăçăн пысăк концерчĕ пулнă. Унпа пĕрле Михаил Федоров, Алена Алексеева юрăçсем те килнĕ. Концерт вĕçленсен «Труд» ЯХПК ертÿçи Валерий Германов пултаруллă артистсене ял-йыш ячĕпе тав тунă.
Н.АЛЕКСЕЕВ.
Иртеççĕ çулсем...
Çак кунсенче Каркаларти Н.Иванова 90 çул тултарчĕ.
Наталья Ильинична Иванова ялти шкулта пуçламăш классенче вĕренекенсене пĕлÿ тата воспитани панă. Çав вăхăтрах мăшăрĕпе, вăрçă участникĕпе, хăйсен 5 ачине те пурнăç çулĕ çине кăларнă.
Н.Ивановăна халĕ 9 мăнукĕ, мăнукĕсен 10 ачи савăнтараççĕ.
Юбилей ячĕпе Наталья Ильиничнăна Кĕçĕн Таяпа ял тăрăхĕн специалисчĕсем, культура çурчĕн ĕçченĕсем саламланă, хаклă парне панă.