01 октября 2016 г.
Росстат кăçалхи утă уйăхĕн 1-çурла уйăхĕн 15-мĕшĕсенче иртнĕ Пĕтĕм Раççейри ялхуçалăх çыравĕн малтанхи оперативлă кăтартăвĕсене пĕтĕмлетнĕ.
Малтанхи цифрăсене тишкерес пулсан, ăсчахсем палăртнă тăрăх, çĕршыври АПК тытăмĕнче курăмлă улшăнусем пулса иртнĕ.
«Росстатăн оперативлă мониторингĕн кăтартăвĕсем тăрăх çырав тапхăрĕнче 36,4 пин ялхуçалăх организацийĕпе 174,8 пин хресчен /фермер/ хуçалăхĕпе уйрăм предпринимательтен, уйрăм хушма хуçалăхпа пурăнакан 18,2 миллион çынран, коммерциллĕ мар пĕрлешÿри 76,3 пин гражданран тĕплĕ статистика кăтартăвĕсене пухнă», - тесе палăртнă Росстат пуçлăхĕ Александр Суринов «2016 çулхи Пĕтĕм Раççейри ялхуçалăх çыравĕн пĕрремĕш кăтартăвĕсем» ятпа Мускавра иртнĕ пресс-конференцире. Сăмах май, Елчĕк районĕнче çырав тапхăрĕнче 18 ялхуçалăх организацийĕпе 98 хресчен /фермер/ хуçалăхĕнчен, уйрăм хушма хуçалăхпа пурăнакан 9306 çынран статистика кăтартăвĕсене пухнă. Респондентсем çыравçăсене кăмăлтан йышăннă, ыйтусем çине тулли хуравсем панă.
«Çĕршыв пĕлтерĕшлĕ яваплă мероприятие хатĕрленсе ирттерес тапхăрта çыравăн пресс-центр сайчĕ тата хĕрÿ лини ĕçленĕ, пултарулăх конкурсĕсемпе викторинăсем иртнĕ, вĕсенче Раççейĕн тĕрлĕ кĕтесĕнче пурăнакан пиншер çын хутшăннă. Çырав çинчен телевиденипе радиора, интернетра йĕркеленĕ реклама Тăван çĕршыва, хамăр пурнăçлакан ĕçе, çемьене юратма хистесе тăчĕ», - тесе аса илтернĕ Александр Суринов.
Раççейри ялхуçалăх çыравĕн малтанхи кăтартăвĕсен пĕрремĕш томне Росстат 2017 çулхи октябрь уйăхĕнче, иккĕмĕш томне, Раççей Федерацийĕн субъекчĕсен кăтартăвĕсем тăрăх, çав çулхи ноябрь уйăхĕнче тăратаççĕ. Пĕтĕмĕшле кăтартусем 8 тома вырнаçмалла, вĕсем 2018 çулхи май-декабрь уйăхĕсенче пичетленеççĕ.