28 сентября 2016 г.
Елчĕк районĕн «Чыс, мухтав сире, Елчĕксем!» гимнĕн авторĕ, Чăваш Республикин культурăн тава тивĕçлĕ ĕçченĕ, пархатарлă ĕçĕшĕн тата ытти нумай ят-сума тивĕçлĕ пулнă пирĕн ентеш - Аслă Елчĕк ялĕнче çуралса ÿснĕ Николай Сергеевич Карлин 70 çул тултарчĕ.
Хальхи вăхăтра ентешĕмĕре хисеплесе Елчĕкри историпе тăван тавралăх музейĕнче унăн пурнăçĕпе тата ĕçĕ-хĕлĕпе çыхăннă куравпа паллашма пулать.
Унсăр пуçне, çитес кунсенче Елчĕк районĕн делегацийĕ Шупашкарти Я.Ухсай ячĕллĕ культура керменĕнче унăн ячĕпе иртекен юбилей каçне хутшăнма хатĕрленет. Унта ЧР тата РФ культурăн тава тивĕçлĕ ĕçченĕ Геннадий Борисов ертсе пыракан халăх хорне те йыхрав панă.
Район администрацийĕн культура тата информаципе тивĕçтерекен пайĕн начальникĕ Антонина Александрова палăртнă тăрăх, Николай Карлин композиторăн 70 çулхи юбилейне çитес вăхăтра Елчĕкре те анлăн паллă тăваççĕ.
С.АНАТОЛЬЕВА.