24 сентября 2016 г.
Чăваш Республикин Пуçлăхĕ Михаил Игнатьев Пăрачкав тата Улатăр районĕсенче Африка чумине тупса палăртнăран карантина хупасси çинчен маларах кăларнă хушăва пăрахăçланă.
Хăрушлăха лекнĕ иккĕмĕш лаптăка пĕчĕклетнĕ. Унта Улатăр, Патăрьел, Вăрнар, Йĕпреç, Комсомольски, Пăрачкав, Çĕмĕрле, Шăмăршă, Улатăрпа Çĕмĕрле хулисем кĕреççĕ. Африка чумине пĕтерессишĕн тата ăна республикăра сарăлма парас мар тесе планпа килĕшÿллĕн çирĕплетнĕ ĕçсене пурне те пурнăçланă. Тĕллеве пурнăçлама ЧР Министрсен Кабинечĕн резерв фондĕнчен Пăрачкав районне - 3 миллион тенкĕ, Улатăр районне 2,2 миллион тенкĕ уйăрса панă. Çунтарнă сыснасемпе аш хуçисен тăкакне саплаштарма 19,934 миллион тенкĕ компенсаци панă.
Ветеринарипе санитари йĕркипе килĕшÿллĕн хăрушлăхри пĕрремĕшпе иккĕмĕш лаптăксенче сыснасене пĕр вырăнтан тепĕр çĕре турттарассипе, ашне сутассипе чару упранса юлать.