24 сентября 2016 г.
Утма тата пуплеме вĕреннĕ ачана ашшĕ-амăшĕ садике вырнаçтарма тăрăшать. Районта виçĕ çултан аслăрах мĕнпур ача валли ача садĕнче вырăн пур. Шăпăрлан ача садне ура ярса пуссассăнах хăйĕн пĕрремĕш вĕрентекенĕпе - воспитательпе паллашать. Унпа вăл чĕрчунпа, ÿсен-тăран тĕнчипе, çутçанталăкпа туслашать, ыррине усаллинчен уйăрма хăнăхать, Тăван çĕршыва юратма, ÿкерме-сăрлама, сăвăсем калама, юрлама вĕренет...
Шкулчченхи тăватă учрежденире те, шкулсенче те ача-пăчана аталанма теттесем, физкультура хатĕрĕсем, аталану вăййисем, вĕренÿ пособийĕсем çителĕклех. Пур çĕрте те çывăрмалли тата вылямалли пÿлĕмсенче хăтлă та тирпейлĕ. Музыка залĕнче илемлĕ юрă-кĕвĕ шăранать. Шăпăрлансем илемлĕ верандăсене уçăлма тухсан вĕсен хаваслă сасси урам тăрăх ян! саланать.
Ачана юратман çын воспитательте ĕçлейместех. Вĕсен ашшĕ-амăшĕ çумĕнчен хăпнă пепкесене йăпатса лăплантармалла, пĕр чĕлхе тупмалла, хăйсен хÿттине илсе чун ăшши, телейпе хаваслăх парнелемелле. Çавăн пекех тата пурнăç йăли-йĕркисене вĕрентме мĕн чухлĕ ăсталăхпа пултарулăх, чăтăмлăх кирлĕ. Районти воспитательсем ырă ята тивĕçлех. Вĕсем пепкесене пур енлĕн воспитани параççĕ. Интереслĕ занятисемпе вăйăсене пĕчĕкскерсем чăтăмсăррăн кĕтеççĕ. Çавна май воспитательсем тавра курăмне, пĕлĕвне тăтăшах ÿстерсе пыраççĕ. Районти «Чи лайăх воспитатель» конкурса кашни çулах йышлăн хутшăнаççĕ. Иртнĕ çулхи лауреатсемпе çĕнтерÿçĕсем /сăнÿкерчĕкре/ хăйсем ачасене юратнине тĕрлĕ тупăшу витĕр тухса тĕплĕ кăтартса пачĕç. Вĕсем пĕринчен тепри маттуртарах, ĕç стажĕсем те пĕчĕк мар. Пурне те пĕрле пĕтĕçтерсе тăраканни вара - хăйсем суйласа илнĕ профессие чунтан парăнни, ачасене чун-чĕререн юратни.
В.СМИРНОВА.