17 сентября 2016 г.
Сертификата тивĕçнĕ
Елчĕк яшĕсемпе хĕрĕсем «МолГород-2016» çамрăксен форумĕнче хастарлăхпа палăрнă.
Çамрăксем хăйсен пултарулăхне тĕрлĕ енчен кăтартнă. Истори квестĕнче Елчĕк-Сĕнтĕрвăрри-Улатăр районĕсен пĕрлештернĕ команди виççĕмĕш вырăна тухнă, сертификата тивĕçнĕ.
Чи лайăххисен йышĕнче
Раççейри çĕнĕ университет тата «Просвещение» издательство шкул сайчĕсен тăххăрмĕш версийĕн пĕтĕм Раççейри рейтингне пĕтĕмлетнĕ.
Рейтинга 4000 ытла сайт хутшăннă. Чи лайăххисен йышне Аслă Пăла Тимешри шкул сайчĕ те кĕнĕ.
Кĕнекесем панă
Аслă Таяпара çуралса ÿснĕ Елена Хĕвелпипе /Елена Васильевна Барская/ Александр ывăлĕ тăван ялти шкул библиотекине 154 кĕнеке парнеленĕ.
Парнесен йышĕнче ытларах - пуçламăш классенче вĕренекенсем валли «Аттил» издательствăра пичетленĕ вырăсла-чăвашла кĕнекесем.
Çынна пурнăç парнелеççĕ
Донор пулни - питĕ сăваплă. Вăл йывăр чирлĕ çынна вилĕмрен çăлса хăварать.
Çĕнĕ Пăвари врач амбулаторийĕнче иртнĕ донор кунне халăх йышлă хутшăннă. 83 донор 33 литр юн панă.
Грипп ан çаклантăр
Грипран хÿтĕленсе прививка тăвасси районта малалла пырать.
Районта хальлĕхе 3720 çынна вакцинаци тунă. Вăл шутран аслисем - 2010, ачасем - 1710. Çак ĕçе районти предприятисемпе организацисенче ĕçлекенсене те хутшăнма чĕнеççĕ. Вĕсен вакцинăна тÿлесе илмелле.