17 сентября 2016 г.
Кĕçнерникун районта, республикăри пекех, пĕрлехи информаци кунĕ иртнĕ. Унта пенсисене 2017 çулта индексацилес, пурăнмалли çуртсемпе коммуналлă хуçалăх объекчĕсене 2016-2017 çулсенчи хутмалли тапхăра хатĕрлес, суйлава ăнăçлă ирттерсе ярас енĕпе ыйтусене тишкернĕ.
Федерацин налук службин Чăваш Республикинчи управленийĕн ертÿçин çумĕ О.Никина, Раççей Пенси фончĕн Елчĕк районĕнчи пайĕн ертÿçи З.Яковлева, район администрацийĕн экономика, пурлăх тата çĕр хутшăнăвĕсен пайĕн ертÿçи М.Павлова, культура тата информаципе тивĕçтерекен пай ертÿçи А.Александрова Тăрмăш тата Хĕрлĕçыр ялĕсенче пурăнакансемпе, Курнавăш шкулĕнчи педагогсемпе тата ял тăрăхĕн активĕпе тĕл пулнă, вĕсен ыйтăвĕсене хуравланă.
Чăваш Республикин вĕренÿпе çамрăксен политикин министрĕн пĕрремĕш çумĕ С.Петрова, район администрацийĕн пуçлăхĕн пĕрремĕш çумĕ Л.Левый Аслă Таяпари, Елчĕкри шкулсен коллективĕсемпе, Аслă Таяпа ял тăрăхĕн активĕпе, депутатсемпе тĕл пулнă. Тĕп ыйтусемсĕр пуçне вĕренÿ тытăмĕпе çыхăннисене те сÿтсе явнă.
Кĕçĕн Таяпа ял тăрăхĕн активĕпе, Кĕçĕн Таяпари шкул, А.Севриков ХФХ коллективĕсемпе ирттернĕ тĕлпулусенче Чăваш Республикин ĕçлев тата социаллă хÿтлĕх министрĕн пĕрремĕш çумĕ Е.Сапаркина, район администрацийĕн ĕçĕсен управляющийĕ Е.Михайлова, районти халăха ĕçпе тивĕçтерекен центр ертÿçи М.Васильева пĕрлехи информаци кунĕн тĕп ыйтăвĕсемсĕр пуçне ял хушшине куçăмлă çул сарас, Таяпа Энтри ялĕнче çĕнĕ йышши ФАП çĕклес тата ытти ыйтусене те çĕкленĕ.
«Эверест» акционерсен хупă обществин генеральнăй директорĕ Н.Герасимов, район администрацийĕн пуçлăхĕн çумĕ Г.Анисимова, социаллă хÿтлĕх пайĕн ертÿçи И.Аникина Аслă Елчĕкри ял тăрăхĕн активĕпе, уйрăм предпринимательсемпе ирттернĕ тĕлпулура тĕп ыйтусемсĕр пуçне ял тăрăхне аталантарассипе, сăмахран, Христос Чĕрĕлĕвĕн чиркĕвĕн çĕнĕ çуртне туса пĕтерессипе çыхăннисене те сÿтсе явнă.
Пĕрлехи информаци кунне хутшăннисем ялсенче çынсене хăйсен ыйтăвĕсемпе те йышăннă, вĕсене татса панă.
А.КАРЛИН.