10 сентября 2016 г.
Тăрăшуллăрах ĕçлеме вăй парать
Пĕтĕм Раççейри олимпиадăсен çĕнтерÿçисемпе призерĕсене хатĕрленĕшĕн Чăваш Енри 48 педагог Чăваш Республикин Пуçлăхĕн Михаил Игнатьевăн премине тивĕçнĕ. Вĕсем хушшинче Елчĕкри пĕтĕмĕшле пĕлÿ паракан вăтам шкул вĕрентекенĕ Виктор Демьянов та пур.
Виктор Петрович Демьяновăн вĕренекенĕ, кăçал шкул пĕтернĕ Данил Кондратьев физкультура предмечĕпе пĕтĕм Раççей шайĕнче палăрчĕ. Ульяновск хулинче иртнĕ олимпиадăра призерсен йышне кĕчĕ.Чăваш Ен Пуçлăхĕ Михаил Игнатьев укçан хавхалантарни Виктор Демьянова малашне те тăрăшуллăрах ĕçлеме вăй парать.
Çемьере туслăх хуçаланать
Пирĕн республикăра тĕрлĕ халăх çынни пурăнать. Тĕрлĕ чĕлхепе калаçаççĕ, тĕрлĕ тĕне тытса пыраççĕ пулсан та вĕсем - Раççей çыннисем. Тăван çĕршыва юратни яланах йывăрлăхран тухма пулăшнă.
Чăваш Тăрăмĕнче Аттелĕхĕн Аслă вăрçин участникĕ Илья Степанович Волков пурăнать. Унăн нумай нациллĕ çемйинче туслăхпа лăпкăлăх хуçаланать. Мăнукĕ, Индира Кадирова, Чăваш патшалăх университетĕнче вĕренет. Тепĕр мăнукĕ, Анваржон Кадиров, Мускавра ĕçлет. Мăнукĕн ывăлĕ, Асалбек Хайитбоев, Аслă Таяпари шкулта 5-мĕш класра пĕлĕвне туптать. Вăрçă ветеранĕ Раççейри пĕтĕм халăха сывлăх, ăнăçу, юрату, телей сунать - çак пахалăх кашнинчен хăйĕнчен килнине палăртать.
Савăк юрăсемпе савăнтарнă
Çак кунсенче Курнавăшра тата çывăх ялсенче пурăнакансем савăк юрăсем итлесе киленнĕ.
Чăваш эстрада çăлтăрĕсем - Константин Евруков, Александр Ильин, Валентина Кузнецова, Сергей Кувшинов Курнавăшри культура çурчĕн сцени çинче тĕрлĕ юрăсемпе савăнтарнă. Куракансем Шупашкарти артистсен концерт программине ăшшăн, алă çупса йышăннă.
Çĕнĕрен ĕçлеме пуçланă
«Улăп» физкультурăпа спорт комплексĕн алăкĕсем çĕнĕрен уçăлнă.
Август уйăхĕн 21-мĕшĕнчен «Улăп» физкультурăпа спорт комплексĕнче юсав ĕçĕсем пуçланнăччĕ. Сентябрĕн 8-мĕшĕнчен сывă пурнăç йĕркине тытса пыракансем унта хăйсен сывлăхне малалла çирĕплетме пултараççĕ.