10 сентября 2016 г.
Паян, сентябрĕн 10-мĕшĕнче, Чăваш патшалăх оперăпа балет театрĕнче Чăваш Республикинче пурăнакан халăхсен съезчĕ иртет.
Чăваш Республики - çĕршывăн нумай нациллĕ регионĕсенчен пĕри. Чăваш Енре 128 халăх представителĕ пурăнать. Вĕсем хăйсен культурине, йăли-йĕркине упрас тесе тимлеççĕ. Пĕр килти пек туслă пурăнма чĕлхе те, тĕн уйрăмлăхĕсем те кансĕрлемеççĕ. Халăхсен хушшинчи хутшăнусене, çыхăнусене çирĕплетме районта та тĕрлĕ майпа - фестивальсемпе, конференцисемпе, «çавра сĕтелсемпе» тата ытти те усă кураççĕ. Çак эрнере районта халăхсен туслăхĕн эрни иртет.
Районти тĕп библиотека. Елчĕк шкулĕн вуннăмĕш класĕсенче вĕренекенсемпе «Наци калейдоскопĕ» калаçу иртнĕ. Унтан «Халăхсен туслăхĕ-литература туслăхĕ» выставка-презентацинче Раççейре пурăнакан халăхсен культурипе, литературипе паллашнă. «Туслăх кĕперĕ» конкурсра шкул ачисем тĕрлĕ халăх сăввисене вуланă. Валери Туркай поэт тĕрлĕ халăх çыннисен сăввисене чăвашла куçарнă «Çиччĕрен - çиччĕ» кĕнеки шкул ачисене уйрăмах кăсăклантарнă. Сăвă лайăх вулакансене - Юля Адюковăна, Артем Александрова Тав хучĕсем парса чысланă. Елчĕкри культработниксем тĕрлĕ халăх юррисене шăрантарнă.
«Шевле» ача сачĕ. Эрне тăршшĕпех ача садĕнче тĕрлĕ халăх культурине, йăли-йĕркине хисеплеме вĕрентес пирки калаçу пынă. Пĕчĕкскерсене тĕрлĕ наци çыннисен костюмĕсемпе, юмахĕсемпе, вăййи-семпе паллаштарнă. Ачасем туслăх çинчен сăвăсем вĕреннĕ. Музыка залĕнче воспитательсемпе шăпăрлансем тĕрлĕ халăх костюмĕсене тăхăнса юрланă, ташланă.
Елчĕкри историпе тăван тавралăх музейĕ. «Чебурашка» ача садне çÿрекенсем кунти «Туслăхпа пĕршухăшлăх кунĕ» девизпа ирттернĕ экскурсире пулнă. Пĕчĕкскерсем тĕрлĕ нацин тумтирĕпе, савăт-сапипе, йăли-йĕркипе интересленсе паллашнă. Вĕсемех музей ĕçченĕсем Бесланта вилнĕ шкул ачисене асăнса хатĕрленĕ «пĕчĕк ангелсене» мĕнле тунипе паллашнă. Злата Григорьева мастер-класра тетте ăсталама вĕреннĕ.