10 сентября 2016 г.
Вăрçăпа ĕç, Хĕç-пăшаллă вăйсен, право органĕсен ветеранĕсен районти канашĕн черетлĕ пленумĕнче çитĕнекен ăрăва тивĕçлĕ патриотла воспитани парасси çинчен калаçу пынă. Пленум ĕçне ветерансем, Чăваш Республикин Патшалăх Канашĕн Председателĕ Ю.Попов, Патшалăх Канашĕн комитечĕн председателĕ П.Краснов, район пуçлăхĕ П.Скворцов, район администрацийĕн пуçлăхĕ Н.Миллин, ял тăрăхĕсен пуçлăхĕсем, районти предприятисемпе организацисен ертÿçисем хутшăннă.
Ветерансен районти канашĕн председателĕ С.Терентьева вăрçăпа ĕç, Хĕç-пăшаллă вăйсен, право сыхлавĕн органĕсен ветеранĕсем çамрăксене патриотла воспитани парас енĕпе мĕнле ĕçлесе пынине тишкернĕ.
Ветерансен районти канашĕнче пурĕ 6 яланхи комисси йĕркеленĕ, çав шутра çамрăксене патриотла воспитани парас енĕпе ĕçлекенни те. Ăна П.Анисимов ертсе пырать. Ун йышĕнче çавăн пекех Р.Бобылевпа Н.Кириллов ветерансем те пур.
Ветерансем тĕрлĕ мероприятисене хутшăнаççĕ. Вĕсем шкулсенчи общество организаци членĕсемпе тĕл пулаççĕ, тĕрлĕ кĕнекесем çыраççĕ. Çавăн пекех районта Совет Союзĕн Паттăрĕсене, Социализмла Ĕç Паттăрĕсене, «хĕрÿ точкăсенче» пуç хунă воинсене асăнса тĕрлĕ спорт мероприятисене ирттересси те йăлана кĕнĕ.
С.Терентьева ялсенчи масарсене йĕркеллĕ тытма, вĕсен картисене юсама ветерансене чĕнсе каланă. Район администрацийĕн вĕренÿпе çамрăксен политикин пайĕн эксперт специалисчĕ Ф.Цыганова районти вĕренÿ учрежденийĕсенче çамрăксене патриотла воспитани парас енĕпе мĕнле ĕçсем туни çинче чарăнса тăнă.
Республика, район ертÿлĕхĕ патриотла туйăма аталантарассинче ветерансен пĕлтерĕшĕ пысăк пулнине, вĕсем ĕçе тивĕçлĕ йĕркеленине палăртнă, тав тунă, ветерансен ыйтăвĕсене хуравланă.
Тăрмăш тата Хĕрлĕçыр ялĕсенчи ветерансен пуçламăш организацийĕн председателĕ В.Щербаков район администрацийĕн пуçлăхне Н.Миллина хăйĕн сăмахне тытнăшăн - Тăрмăш ялĕнчи куçăмлă автоçула тунăшăн Тав çырăвĕ панă.