07 сентября 2016 г.
Çурла уйăхĕн 3-мĕшĕнчен пуçласа авăн уйăхĕн 17-мĕшĕччен Чăваш Республикинчи вырăнти суйлав комиссийĕнче çирĕплетекен удостоверени параççĕ. Суйлавçă унпа усă курса авăн уйăхĕн 18-мĕшĕнче çĕршыври кирек хăш суйлав участокĕнче те сасăлава хутшăнма пултарать.
РФ Патшалăх Думин депутачĕсене суйламашкăн çирĕплетекен удостоверение пирĕн республикăра 2,5 пин çын илнĕ, ЧР Патшалăх Канашĕн депутачĕсене суйлама кăшт сахалрах. Цифрăсен «чĕлхине» куçарсан çакă Чăваш Енри суйлавçăсен 0,25 проценчĕ пулать. Удостоверенисен йышĕ самай пысăк - 38 пин хатĕрленĕ.
Çак документа илес текенсен шучĕ вара суйлавччен 10 кун юлсан ытларах ÿсет. Авăн уйăхĕн 7-мĕшĕнчен тытăнса удостоверение суйлав участокĕнче те пама пуçланă. Анчах та илнĕ документа çухатма е каялла тавăрса пама юрамасть, ăна тепĕр хут памаççĕ.
Çирĕплетекен удостоверение пĕр-пĕр сăлтава пула вырăнта суйлава хутшăнма пултарайманнисене те параççĕ. Çавăнпа та вăл суйлавçăшăн питĕ пĕлтерĕшлĕ документ пулса тăрать.