07 сентября 2016 г.
Район администрацийĕн пуçлăхĕ Н.Миллин ертсе пынă ушкăн Патăрьел районĕнчи Ыхра Çырми ялĕнчи Рашид Санзяпов хресчен /фермер/ хуçалăхĕнчи малта пыракан ĕç опычĕпе паллашнă.
Пуçаруллă предприниматель ÿсен-тăран отрасльне аталантарассине те, выльăх-чĕрлĕх ĕрчетессине те кирлĕ шайра йĕркелесе пырать. Унсăр пуçне, вăл выльăх-чĕрлĕхе пусса тирпейлекен пысăк цех туса лартнă, ăна тухăçлă ĕçлеттерме те пултарать.
Рашид Санзяпов патшалăх пулăшнипе усă курса иртнĕ çулсенче пушă ларакан кивĕ витене реконструкци туса çĕнетнĕ. Çапла майпа ĕне выльăхсен хисепне те ÿстерме май килнĕ. Хальхи вăхăтра кунта пурĕ 250 пуç мăйракаллă шултăра выльăх, çав шутран 120 сăвăнакан ĕне шутланать. Рашид Шайхуллович пирĕн район ертÿçисемпе куçа-куçăн тĕл пулсан хăйĕн малашнехи ĕç тĕллевĕсем пирки те пытармасăр каласа кăтартнă: 400 выльăха вырнаçтармалли тепĕр вите туса лартмалла.
Предприниматель усă курман, çумкурăкĕ алхаснă вун-вун гектар çĕр лаптăкне те кĕске вăхăт хушшинче пусă çаврăнăшне кĕртнĕ. Тăрăшса ĕçлени - куç умĕнче. Хальхи вăхăтра вăл 1560 гектар çĕр лаптăкĕпе усă курать.