03 сентября 2016 г.
Хваттерпе тивĕçтернĕ
Патшалăх шайĕнчи тĕллевлĕ программăпа усă курса ашшĕ-амăшĕн хÿттисĕр тăрса юлнă ачасене çурт-йĕрпе тивĕçтересси çине республикăра, çав шутра пирĕн районта та пысăк тимлĕх уйăраççĕ.
Иртнĕ кунсенче районти тата икĕ тăлăх ачана - Денис Алякина тата Сетнер Петрова хăтлă хваттерсемпе тивĕçтернĕ. Район администрацийĕн пуçлăхĕн пĕрремĕш çумĕ - вĕренÿпе çамрăксен политикин пайĕн ертÿçи Леонард Левый çĕнĕ хваттерсен хуçисене савăнăçлă лару-тăрура чысланă май малашлăхра телейлĕ кун-çул, палăртнă тĕллевсене пурнăçа кĕртме ăнăçусем суннă.
Денис Алякинăн ĕмĕчĕсем те пысăк. Пурнăçри йывăр шăпапа килĕшсе лăпланса ларма шухăшламан çамрăк малтанласа аслă пĕлÿ илмеллине ăнланнă. Хальхи вăхăтра вăл Шупашкарти И.Н.Ульянов ячĕпе хисепленекен Чăваш патшалăх университетĕнче пĕлÿ пухать. Денис район администрацийĕн ертÿçисене унăн нушине ăнланнăшăн, хваттерлĕ пулма пулăшнăшăн чун-чĕререн тав тунине пĕлтернĕ.
Ĕç малалла пырать
Тÿскелĕнче культурăн нумай функциллĕ центрĕн çуртне тăвасси малалла пырать.
Хальлĕхе кунта строительствăн пĕтĕмĕшле ĕçĕсем пыраççĕ: пушара хирĕçле шыв резервуарне, кĕмелли тĕп вырăнта пусма вырнаçтарнă, çивиттине витеççĕ, территорие тирпей-илем кĕртеççĕ. Ĕçсене «Мира» ООО строителĕсем пурнăçлаççĕ. Центрта 120 вырăнлăх курав залĕ, кружоксем валли пÿлĕмсем, анлă фойе пулаççĕ. Хальхи вăхăтра сĕтел-пукан, музыка инструменчĕсем, ытти оборудовани туянма саккассем панă.
Пулăçсен ăмăртăвĕ
Аслă Елчĕкри Тĕпсĕр кÿлĕре милици майорне В.Н.Грядкина асăнса пулăçсен турнирĕ иртнĕ.
Командăсенчен полици пайĕн команди иккĕмĕш вырăна тухнă. Пĕрремĕшпе виççĕмĕш вырăнсене Аслă Елчĕксен «Тутăхнă вăлта йĕппи» тата «Акула» командисем йышăннă.
Уйрăм çынсен те çитĕнĕвĕсем курăмлă. Полици пайĕнче тăрăшакан Альберт Никитин чи нумай пулă тытнă. Кунтах Алексей Черновпа Данил Волков та палăрнă.
Чи пысăк пулă тытакан ята Алексей Чернов тивĕçнĕ. Валерий Грядкинпа Сергей Емельянов та унран кăшт çеç каярах юлнă.
Турнира йĕркелекенсем - Александрпа Андрей Грядкинсем.