27 августа 2016 г.
Раççей Кино çулталăкне халалласа паян районта пĕрремĕш хут «Кино каçĕ» акци иртет. Унăн тĕп тĕллевĕ - халăха кино курма явăçтарасси.
Халĕччен районта «Музей каçĕ» «Искусство каçĕ», «Библиокаç» акцисем интереслĕ иртетчĕç. Çĕнĕ акцин программине те кăсăклă йĕркеленĕ.
Районти тĕп площадьре 15 сехетре «Асфальт çинче кино ÿкеретпĕр» конкурс иртет. 17 сехетрен «Елчĕк ен» сăнÿкерчĕк студийĕ ĕçлет. Елчĕкри историпе тăван тавралăх музей ĕçченĕсем «Пурте киле валли» мастер-класс ирттереççĕ.
«Кино каçĕ» акци районти Тĕп лапамра каçхине ултă сехетре уçăлать. Ун хыççăнах «Кинофильмсенчи юрăсем» районти конкурс иртет. 20 сехетре çĕршывĕпех киносеанс пуçланать. Чи малтанах ачасем валли «Смешарики: Легенда о золотом драконе» /6+/ мультфильм кăтартаççĕ. Каçхи кинона кăмăллакансем вара 21 сехет те 30 минутра «Батальон» /12+/ фильма курĕç.
Уяв Аслă Елчĕкри, Аслă Пăла Тимешри, Çирĕклĕ Шăхалĕнчи, Патреккелĕнчи, Лаш Таяпари, Курнавăшри Тĕп площадьсенче те иртет. Акци кашни ял тăрăхĕнчех 18 сехетре пуçланать. Куракансене кинона тÿлевсĕрех кĕртеççĕ.
Кулленхи ĕçĕрсене вĕçлĕр те «Кино каçне» васкăр. Пурне те хапăл тусах кĕтетпĕр.
В.ПОРТНОВА.