24 августа 2016 г.
Тунтикун район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Хаçат вулаканĕсем Пăрачкав районĕнчи Напольное салинче Африка мурне тупса палăртнине пĕлеççĕ ĕнтĕ. Выльăх-чĕрлĕх чирĕсене хирĕç кĕрешекен районти станци начальникĕ Ирина Николаева çавна май хăрушă чир сарăласран республикăра, районта пурнăçланакан мероприятисем çинчен каласа пачĕ. Пирĕн район хăрушлăхпа иккĕмĕш зонăна кĕрет. Район территорийĕнчи пасарсенче сыснасемпе, вĕсен ашĕнчен хатĕрленĕ продуктсемпе суту-илÿ тума юрамасть. Сыснасене витесенче çеç усрамалла тата ытти те. Район администрацийĕн пуçлăхĕ Африка мурĕ, ăна сарăлма парас марри пирки халăх хушшинче ăнлантару ĕçне анлăн сарса ямаллине, профилактика ĕçĕсене çирĕп пурнăçласа пымаллине палăртрĕ. Кунта кашни çыннăн яваплăхĕ пысăк пулмалла.
Ялхуçалăх çыравĕ Елчĕк районĕнче мĕнле иртни çинчен çырав ирттерессипе районти уполномоченнăй Людмила Горшкова каласа пачĕ. Аса илтеретпĕр: июлĕн 1-мĕшĕнчен пуçласа августăн 15-мĕшĕччен çĕршывра Ялхуçалăх çыравĕ пулнă. Çыравçăсем районта ялхуçалăхĕнчи 18 организаци пирки сведенисем пуçтарнă, 89 хресчен /фермер/ хуçалăхне, 9388 уйрăм хушма хуçалăха çырса илнĕ. Халĕ çырав объекчĕсене суйласа илсе тепĕр хут тĕрĕслеççĕ.
Ялхуçалăх пайĕн начальникĕ Петр Тремасов районти уй-хир ĕçĕсемпе паллаштарчĕ /тĕплĕнрех 1-мĕш страницăри сводкăра çутатнă/.
Канашлура район пурнăçĕпе çыхăннă ытти ыйтусене те пăхса тухнă.