10 августа 2016 г.
«Вулакан картиш» -
çак ятпа иртет тĕп библиотекăн ача-пăча пайĕ йĕркеленĕ акци.
Шкул ачисен халĕ çуллахи кану тапхăрĕ. Елчĕкри тăванĕсем патне килнĕ çамрăксем те сахал мар. Вĕсен канăвне тивĕçлипе йĕркелес, ачасем кану вăхăтĕнче те кĕнеке çинчен манса ан кайччăр тесе иртет те çак акци. Ăна Комсомол, Пĕрремĕш май, Мир, Юбилей урамĕсенче ирттернĕ те ĕнтĕ. Библиотекарьсем район центрĕнчи ытти урамсенчи ачасемпе те тĕл пулĕç.
Олимпиада çинчен пĕлетĕр-и?
Бразилири Рио-де-Жанейро хулинче иртекен çуллахи Олимп вăййисем августăн 5-мĕшĕнче пуçланчĕç. Вĕсем августăн 22-мĕшĕнче вĕçленеççĕ.
Тĕнчери чи пысăк спорт уявне - Олимп вăййисене халалласа районта тĕп библиотекăра «Спорт! Спорт! Спорт!» курав йĕркеленĕ. «Олимп çулăмĕн çулĕпе» пайра Олимпиадăсен кун-çулне сăнлакан, «Олимпиада çăлтăрĕсем» пайра пирĕн çĕршывăн мухтавлă спортсменĕсемпе тренерĕсене, спорт дисциплинисемпе ăмăртăвĕсене халалланă кĕнекесем вырăн тупнă.
Курав вулав залĕнче вырнаçнă.
Пытарнăшăн - социаллă тÿлев
Районти социаллă хÿтлĕх пайĕ пурнăçран уйрăлнă çынсене пытарнăшăн 21 çынна 110822,88 тенкĕ пособи тÿленĕ.
Çак социаллă тÿлеве вилнĕ çын ниçта та ĕçлемен тата пенси укçи илмен пулсан çеç параççĕ. Çавăн пекех ăна вилнĕ çул çитмен ачасен ашшĕ е амăшĕ, енчен те ĕçлемен пулсан, илме тивĕç. Пособи виçи кăçал 5277,28 тенкĕпе танлашать.
Кашни çыннăн пĕлмелле
Тем те пулма пултарать пурнăçра. Инкек-синкек сиксе тухсан, мĕнле майпа пулăшу ыйтмалла;
Инкек пирки тĕрлĕ майпа пĕлтерме пулать. Килти телефонран пушар хуралне тата çăлавçăсене - 01, полицине - 02, «Васкавлă пулăшу» сотрудникĕсене - 03, авариллĕ газ службине - 04 телефонсемпе, карас телефонĕпе маларах асăннă службăсене 101, 102, 103, 104 телефонсемпе пĕлтермелле.
Енчен те сирĕн карас телефонĕ çинче укçа-тенкĕ, SIM карта çук е ăна блокировка тунă пулсан ятарлă службăсене 112 телефонпа пĕлтерни вырăнлă.