06 августа 2016 г.
Хисеплĕ ята тивĕçнĕ
Курнавăшра çуралса ÿснĕ, районăн экономикăпа социаллă аталанăвне пысăк тÿпе хывнă /уйрăмах газ кĕртес тĕлĕшпе/ Илья Кузнецова «Елчĕк районĕн хисеплĕ гражданинĕ» ят парса чысланă.
Илья Васильевич райпо председателĕн çумĕнче, райадминистрацин капиталлă строительство, газификаци тата пурăнмалли çурт-йĕрпе коммуналлă хуçалăх пайĕн начальникĕнче, район администрацийĕн пуçлăхĕн çумĕнче тăрăшнă. Хальхи вăхăтра И.Я.Яковлев ячĕллĕ Чăваш патшалăх педагогика университечĕн администраципе хуçалăх управленийĕн начальникĕнче ĕçлет.
Уй-хирте - агитбригадăсем
Ĕççи вăхăтĕнче районти агитбригадăсем уй-хирте, йĕтем çинче вăй хуракансем патне час-часах çитеççĕ.
Аслă Пăла Тимешри «Çĕнтерÿшĕн», Аслă Таяпари «Ылтăн сасă» агитбригада членĕсем тыр-пул пуçтарса кĕртекенсене илемлĕ юрă-ташăпа савăнтарнă.
В.Путинран - салам открытки
Районта вăрăм ĕмĕрлĕ çынсем нумай пурăнни савăнтарать.
Вĕсем хăйсен ĕмĕрне ĕçре ирттернипе çамрăксемшĕн ырă тĕслĕх пулса тăраççĕ. Ватăсенчен пĕри - Кĕçĕн Шăхалĕнчи Николай Поликарпов. Вăрçă ветеранне 90 çул тултарнă май Курнавăш ял тăрăхĕн пуçлăхĕн çумĕ В.Турхан РФ Президенчĕн салам открыткине вуласа панă. Культура ĕçченĕсем уяв юррисем шăрантарнă.
Г.Борисов - çĕнтерÿçĕ
Шупашкарти ЮТВ телеканал çулсеренех чăваш чĕлхине пропагандăлас тĕллевпе конкурссем ирттерет.
Телеканал чăвашла юрлакансене тата çыракансене хавхалантарса «Чи лайăх хĕрарăм юрăç», «Чи лайăх арçын юрăç», «Чи лайăх юрă», «Чи лайăх дуэт», «Чи лайăх автор» тата ытти номинацисене палăртать. «Ăраскал» премие Патреккел халăх хорĕн хормейстерĕ, РФ тата ЧР культурăн тава тивĕçлĕ ĕçченĕ Геннадий Борисов тивĕçнĕ.