06 августа 2016 г.
Район администрацийĕн пуçлăхĕн пĕрремĕш çумĕ - вĕренÿпе çамрăксен политикин пайĕн пуçлăхĕ Леонард Левый ертсе пыракан ушкăн тĕрĕслеве «Чебурашка» ача садĕнчен пуçларĕ. Кунта урамранах тасалăхпа тирпейлĕх хуçаланни курăнать. Территорине йĕркене кĕртсе кашни япалана хăй вырăнĕнче тытнине палăртрĕç. Ольга Иванова заведующи ертсе пынипе воспитательсем ашшĕ-амăшĕпе туслă çыхăнура. Çакна «Чебурашка» ача садне хăйсен ачисене ярас кăмăллисен йышĕ çулсерен ÿсни те кăтартса парать. Çапах та котельнăйĕнчи тирпейлĕх çÿлти шайра маррине те палăртмалла.
Ачасемпе çамрăксен А.В.Игнатьев ячĕллĕ «Улăп» спорт шкулĕ икĕ çурта пĕрлештерсе тăрать. Кунта хисеплĕ те паллă ентешĕмĕр Ардалион Игнатьев олимпиец çинчен хатĕрленĕ стенд пур. Тата та пуянрах материалсем тупма май пуррине асăрхаттарчĕ Леонард Васильевич. Спорт комплексне сăрланă, анчах тирпей-илем кĕртмелли хатĕрсем çителĕксĕрри курăнчĕ.
«Улăп» физкультурăпа спорт керменĕ юсав ĕçĕсене каяраха хăварнă, çавăнпах-и тен, кунта комиссине кĕтмен те пулĕ текен шухăш çуралчĕ. Пурнăçламалли ĕçсенчен чи курăмли - бассейна юсасси. Физкультура комплексĕнче вăй хуракансем пĕлтернĕ тăрăх, унта тумалли ĕçсен калăпăшĕ 2 миллион тенкĕпе танлашать.
- Елчĕкри вăтам шкулта çĕнĕ вĕренÿ çулĕнче 615 ача вĕренме пуçлĕ. Пĕрремĕш класа 62 ача килмелле. Чи пысăк йывăрлăх - учительсем çитменни. Пире акăлчан чĕлхине, пуçламăш классене тата математикăна вĕрентекенсем кирлĕ, - пĕлтерет шкул директорĕ Лариса Васильева.
Кăçал шкула çĕнетме нумай укçа-тенкĕ тăкакланă. Кабинетсенчи чÿречесене улăштарма çеç 150 пин тенкĕ расхутланă, стенасемпе урайсене сăрласа 300 пин тенке яхăн пĕтернĕ. Çавăн пекех икĕ кабинетра урайне линолиум сарнă, сенсор кабинечĕ валли оборудовани туяннă тата ытти те. Вĕренекенсене ăшă та хăтлă, çутă та тирпейлĕ классем кĕтеççĕ. Елчĕк шкулĕн вĕрентекенĕсемпе вĕренекенĕсем хăйсен пултарулăхĕпе районта кăна мар, республика, Раççей шайĕнче палăраççĕ. Данил Кондратьев, акă, физкультура предмечĕпе /вĕрентекенĕ Виктор Демьянов/ Раççей шайĕнче палăрчĕ. Истори учителĕ Владимир Николаев «Чăваш Енри çулталăк учителĕ - 2016» конкурсăн лауреачĕ пулса тăчĕ.
Поварсем столовăйĕнчи çĕнĕ оборудованисемпе техĕмлĕ апат-çимĕç хатĕрлеме лайăххине палăртрĕç. 80 вырăнлă столовăйĕнче 3 повар, 1 техработник вăй хурать.
Кивĕ Эйпеç шкулĕнче юсав ĕçĕсем пĕтмен-ха. Кунта ăшă туалетсем тума 841 пин тенкĕ уйăрнă. Хăйсен вăйĕпе видеокамера, шыв ĕçмелли фонтанчик туяннă. Классене сăрланă. Шкул çулне çитмен ушкăнсен пÿлĕмĕсем кăмăла хуçрĕç, тирпейлĕхпе тасалăх «килсе çитеймен» вĕсем патне.
Аслă Пăла Тимеш шкулĕ, пĕчĕкрех çитменлĕхсене шута илмесен, 51 ачана хăйĕн ытамне илме хатĕр. Пĕрремĕш класа 4 шăпăрлан килмелле. Классене сăрласа çĕнетнĕ, хăшĕ-пĕрисенче светильниксене улăштарнă, вĕрентекенсем хăйсен кабинечĕсенче ăшă кăмăлпа кĕтсе тăраççĕ. Акăлчан чĕлхи вĕрентекенĕ çукки çинчен пăшăрханса пĕлтерчĕ шкул директорĕ Галина Пчелова.
Кушкăри пĕтĕмĕшле пĕлÿ паракан вăтам шкулта спонсорсем пулăшнипе 55 пин тенкĕлĕх пĕчĕк юсав ирттернĕ: кабинетсенчи, коридорти урайсене, алăксене, стенасене сăрланă, физика кабинетĕнчи линолиума улăштарнă. Спортзала юсаса çĕнетес ĕç вĕçленмен-ха. Рабочисем тăрăшсах ĕçлеççĕ кунта. Шкул территорийĕ яланхи пекех тирпейлĕ, таса. Газ хуçалăхĕн ĕçченĕ Кушкăсен котельнăйĕ чи лайăххисенчен пĕри пулнине палăртрĕ. Учительсен августри конференцийĕн предметсен секцийĕсен ĕçне Кушкăра ирттерме, унччен юсав ĕçĕсене вĕçлеме палăртнă. Мария Шавкина социаллă педагог сенсор кабинечĕпе паллаштарчĕ. Кунта çĕнĕ вĕренÿ çулне 119 ача килмелле, вĕсенчен 9-шĕ - пĕрремĕш класа.
Шăмалак шкулĕнче классенчи, коридорти урайсене сăрланă, шкул тăррине юсанă, спортзала тĕпрен юсаса çĕнетнĕ. Ача сачĕн территорийĕнче те çĕнĕлĕхсем нумай. Кунта ачасене вылямалли тĕрлĕрен оборудовани ăсталанă. Шăмалак ялĕнчи 35 ача /пĕрремĕш класа килекен çук/, Яманчÿрелĕнчен 30 ача /вĕсенчен 8-шĕ пĕрремĕш класа/ парта хушшине лармалла.
Лаш Таяпа шкулĕн сăн-сăпачĕ нумай çĕнелсе улшăннă. Шкул умĕнче тĕрлĕрен чечексем куçа илĕртеççĕ, йăрăс йывăçсене «шурă кĕпе» тăхăнтартнă тейĕн, аякранах курăнаççĕ. Виçĕ класа тĕпрен юсанă, урайсене сăрланă, нумай çĕрте çĕнĕ алăксем лартнă. Спортзалта та физкультура урокĕсене ирттерме кирлĕ условисем пур. Вĕренекенĕсемпе тата вĕрентекенĕсемпе мухтанмалли пур Лаш Таяпа шкулĕн. Çулсерен Ираида Павлова вĕренекенĕсем республика, Раççей шайĕнче биологи, экологи предмечĕсемпе иртекен олимпиадăсенче палăраççĕ. Нумаях пулмасть пултаруллă вĕрентекене «Чăваш Республикин тава тивĕçлĕ учителĕ» хисеплĕ ят парса чысланă.
Лаш Таяпара нумай ĕç тунă пулсан та ача сачĕн пÿлĕмĕсем патне ал çитейменни курăнчĕ. Кунта 150 ача вĕренме килессе кĕтеççĕ. Пĕрремĕш класа килекенсен йышĕ - 13. Тăххăрмĕш класран вĕренсе тухакансенчен пиллĕкĕшĕ çеç тăван ялта юлнипе вуннăмĕш класс уçăлмасса пултарать кунта.
Е.НИКИФОРОВА.
Сăнÿкерчĕкре: Илем куçа курăнать.