06 августа 2016 г.
Александр Светопольский Курнавăш ялĕнче çуралса ÿснĕ. Хула пурнăçне килĕштермен вăл, тăван тăрăхра тĕпленме шухăшланă.
2001 çулта шкул пĕтернĕ хыççăн Мускава ĕçлеме каять, унтан таврăнсан тÿрех «Нива» ЯХПКна ĕçе вырнаçать.
- Тăван кил, тăван кĕтес патне чун туртать, - тет пултаруллă çамрăк. Александр ACROS-530 комбайнпа хăй кăмăлланă ĕçĕнче 2008 çултанпах вăй хурать. Мĕн пĕчĕкренех техникăна юратнă Саша унтан уйрăлма та шухăшламан. Ашшĕ те ачаранах уй-хир ĕçĕсене хăнăхтарнă ăна. Халĕ пултаруллă комбайнера кун çути панă ашшĕпе амăшĕ - сумлă пенсионерсем.
Хăйне пулăшаканĕпе, Валерий Вениаминович Николаевпа, чылай çул пĕрле ĕçлеççĕ. Саша ун пирки хальхинче те ырăпа аса илчĕ. Хăй вара механизаторсем ăмăртăвĕнче яланах малти. Районти комбайнерсем хушшинче «Вырма чемпионĕ» ята тивĕçнĕ.
Çамрăк комбайнер çемьеллĕ ĕнтĕ.
- Хула пурнăçне килĕштерместĕп, тăван çĕр сĕткенĕ вăй-хăват хушать, хавхаланса ĕçлеме хистет, - кăмăллăн калаçрĕ Александр. Мал ĕмĕтлĕ çамрăка малашнехи çак çăмăл мар ĕçре çитĕнÿсем тума, малалла та çавăн пек хăйĕн чысне районта çеç мар, республика, Раççей шайĕнче хÿтĕлеме ăнăçусем сунатпăр.
Татьяна ИШМУРАТОВА.