30 июля 2016 г.
Курнавăшри «Нива» агрофирма» ОООри çĕр ĕçченĕсем 120 гектар çинче ăнса çитĕннĕ кĕр тыррисене пĕр эрне каяллах пÿлмесене тăкаксăр пухса кĕртнĕ.
- Пĕр гектартан тухакан вăтам тухăç 30 центнерпа танлашрĕ. Ăна тÿрремĕн çапса тĕшĕлеме май килни ĕçе хăвăртлатма та пулăшрĕ, - тесе каласа кăтартрĕ Юрий Салмин тĕп агроном.
Фунгицидсемпе, ÿсен-тăрана парка çитĕнме пулăшакан микроудобренисемпе усă курнăран пĕрчĕллĕ тата пăрçа йышши культурăсем лайăх ÿссе çитĕннĕ. Çум курăка тата тĕрлĕ чир-чĕре пĕтерекен препаратсемпе усă курни те куç умĕнче - анасем епле таса.
Кăçал тĕш тырă нÿрĕлĕхĕ нормăна тивĕçтерет, вăл 14 процента яхăн. Çавна май комбайн вырса çапнă тырра алласа тасатнă хыççăн тÿрех кĕлете леçнĕ. Апла пулин те иртнĕ çулсенчи йывăрлăхсене шута илсе черетлĕ вырма ĕçĕсене пурнăçлама кунта тата тĕплĕнрех хатĕрленнĕ. Ялти ылтăн алăллă çынсем - Альберт Волковпа Альберт Смирнов, тивĕçлĕ канури Изосим Ефимовпа Иван Манаскин 20 çула яхăн усăсăр ларнă Польша çĕршывĕнче туса кăларнă М-819 йышши тĕш тырă алласа типĕтекен хăватлă техникăна çĕнĕрен «чун» кĕртнĕ. Çак пысăк ĕç каланипе анчах пулса тăман. Пĕр пек ĕмĕтлĕ - тăван ял пуласлăхĕшĕн чун-чĕрисемпе хыпса çунакан çак çынсем хăватлă техникăна вырма вăхăтне ĕçлеме ĕлкĕртес тесе пĕр уйăха яхăн килĕсене каймасăр тенĕ пек тăрăшнă. Шухăшланине пурнăçлама та пултарнă. Пĕр сехетре 20 тонна тырра алласа тасатакан тата типĕтекен хăватлă техника хальхи вăхăтра чарăнмасăр, тухăçлă ĕçлени вĕсене хăйсене те савăнтарать. Николай Гладков директор та чăн маçтăрсен ĕçĕпе кăмăллă пулнине пĕлтерчĕ.
Ялхуçалăх предприятийĕнче кăçал пĕрчĕллĕ тата пăрçа йышши культурăсене пурĕ 894 гектар çинчен пухса кĕртмелле. Чи пысăк лаптăкра - тулă, вăл - 514 гектар, çав шутран 100 гектарне элита репродукцири Экада-109 вăрлăхпа усă курса акнă. Çак анари пучахсем уйрăмах тулли пулнине хамăр курса ĕнентĕмĕр. Сăмах май, «Нива» агрофирма» ОООра кашни çул /100 гектартан кая мар/ çĕнĕ йышши вăрлăхсене ĕçе кĕртеççĕ.
Тыр-пула пухса кĕртме икĕ комбайн хутшăнать, пĕри - «ACROS-530», тепри - «ДОН-1500». Вĕсене шанчăклă çынсем ĕçлеттереççĕ - Александр Светопольский тата Альберт Смирнов механизаторсен ĕçри ăсталăхĕ пысăк. Валерий Николаевпа Андрей Светопольский, комбайнерсен пулăшаканĕсем, вĕсем те хăйсен яваплăхне лайăх ăнланаççĕ. Григорий Фоминпа Алексей Васильев водительсем пулса тăрăшаççĕ. Çапса тĕшĕленĕ тырра уй-хиртен чăрмавсăр турттарса тăрасси хальхи вăхăтра вĕсен тĕп тивĕçĕ пулса тăрать - шанăçа тивĕçлипе тÿрре кăлараççĕ.
«Нива» агрофирма» ОООра çĕрулми туса илесси çине те пысăк тимлĕх уйăраççĕ. Кăçал ăна 100 гектар лартса хăварнă.
Светлана АРХИПОВА.
Николай Гладков директорпа Юрий Салмин тĕп агроном ăнса çитĕннĕ тыр-пул уйĕнче.