27 июля 2016 г.
Пĕтĕм политика партийĕсен суйлав умĕнхи съезчĕсем хыçа юлчĕç. Патшалăх Думин депутачĕсен кандидачĕсене партисен списокĕсемпе палăртнă. Çапах та сентябрĕн 18-мĕшĕнче Чăваш Енĕн Патшалăх Канашне те суйлатпăр. Унăн депутачĕсен кандидачĕсене вара политика партийĕсен регионти парти конференцийĕнче палăртаççĕ.
Иртнĕ эрнекун, июлĕн 22-мĕшĕнче, «Единая Россия» политика партийĕн Чăваш регион уйрăмĕн XXIV конференцийĕ иртрĕ. Форума единороссем Чăваш Патшалăх филармонийĕн залĕнче йĕркелерĕç. Конференцине ирттерме йĕркелевçĕсем тĕплĕн хатĕрленнĕ. Делегатсемпе хăнасене «Вăйлă Раççей - пĕрлĕхлĕ Раççей» пысăк баннер кĕтсе илчĕ. Фойере кĕвĕ янăрать. Пÿлĕмре парти стилистики тÿрех палăрать. Уйрăмăнах «Пĕрлĕхлĕ Раççей команди тунă» тематикăпа хатĕрленĕ иллюстрацисен пуххи хăйĕн патне йыхравлать. Куçса çÿрекен плакатсенче тĕрлĕ облаçри тата тытăмри çитĕнÿсене палăртнă, туллин кăтартнă. Конференцине хутшăнакансем вĕсемпе кăсăкланса паллашрĕç. Çак темăпах хатĕрленĕ пысăк мар фильма та конференцине хутшăнакансене кăтартрĕç. Единороссен кăтартмалли, чăнах та, пур. Конференци малалла тăсăлнă май, вĕсем çивĕч ыйтусенчен пăрăнманни те паллă пулчĕ. Тухса калаçакансен сăмахĕсенче общественноçпа пĕрле кирек мĕнле ыйтăва та, çав шутра чи çивĕччисене те сÿтсе явма хатĕр пулни палăрчĕ.
Конференцине «Единая Россия» партин Чăваш регион уйрăмĕн секретарĕ Николай Малов уçрĕ тата ертсе пычĕ. Конференцин президиумне тата ĕç органĕсене йĕркеленĕ хыççăн тÿрех ĕçе пуçăнчĕç.
Конференцине хутшăнакансене Чăваш Республикин Пуçлăхĕ Михаил Игнатьев саламларĕ. Вăл хăйĕн уçăмлă та хĕрÿ сăмахĕсенче Чăваш Енĕн социаллă пурнăçĕпе экономикин çитĕнĕвĕсене кĕскен сăнласа кăтартрĕ. Вĕсем республика Правительстви «Единая Россия» партин регионти организацийĕпе тачă çыхăнса ĕçленипе çеç пулнине уйрăммăн палăртрĕ. Йышăннă программăсем пурнăçа кĕрсе пыраççĕ, сăмах пани пурнăçланать. Çапах та, Михаил Игнатьев сăмахĕсемпе, малашне пурнăçламалли ыйтусем сахал мар. Вăл конференцине хутшăнакансене вĕсене пурнăçлама пĕтĕм вăя хума чĕнсе каларĕ, çитес суйлавсенче çĕнтерессе шанса тăнине палăртрĕ. Çак сăмахсене сцена çинчи пысăк экран çинче кăтартнă слайдсем те уççăн çирĕплетрĕç.
Унтан Чăваш Енри единороссен лидерĕ Николай Малов сăмах илчĕ. Вăл партин регионти организацийĕн ĕç-хĕлĕпе тĕплĕн паллаштарчĕ. Николай Владимирович партин XV съездĕнче Раççей Президенчĕ Владимир Путин тухса калаçнă чухне палăртнисене - çынсене илтме, панă сăмахсемшĕн явап тытмаллине, шалти политика лару-тăрăвне суллантарма кирлĕ маррине - аса илчĕ. Николай Малов парти организацийĕн суйлав умĕнхи тата малашлăх çулĕсенчи задачăсене палăртрĕ. Çавăн пекех хăйĕн ĕçтешне Леонид Черкесова РФ Патшалăх Думине депутата суйланма 38-мĕш Шупашкар суйлав округĕ тăрăх кандидата тăратнă ятпа саламларĕ.
Унтан Шупашкарти 5-мĕш гимнази директорне Инна Владиславовна Исаевăна сăмах пачĕç. Вăл партин «Чăваш Ен - пурăнмашкăн хăтлă регион. Аталану приоритечĕсем» проектне пурнăçа кĕртесси çинчен чарăнса тăчĕ. Инна Владиславовна çĕршывăн ертÿлĕхĕ - Путин Президентпа «Единая Россия» лидерĕ, Правительствăн ертÿçи Дмитрий Медведев хальхи экономика лару-тăрăвĕнче тĕп çул-йĕре суйласа илме чĕннине палăртрĕ. Парти проекчĕ суйлав умĕнхи программăна анлăлатма пулăшнине пĕлтерчĕ. Инна Исаева партин Чăваш регион уйрăмĕ ку енĕпе ĕçленине, унăн шухăшĕпе, партин республикăри организацийĕн ăнланулăхĕ пысăк пулнине палăртрĕ. «Единая Россия» партин ĕç-хĕлне йĕркелессинче общественноçпа тачă çыхăнни тĕп вырăнта пулмалла. Çавăнпа çавра сĕтелсемпе тематика форумĕсем ирттерме палăртнă. Çынсемпе тĕл пулнă вăхăтра медицина аталанăвĕпе, хальхи йышши çул-йĕр тăвассипе, тивĕçлĕ ĕç укçипе ĕç вырăнĕсем йĕркелессипе çыхăннă ыйтусем чи малти вырăнта. Çак енĕпе Чăваш Енри единороссем малашне те ĕçлесе пырĕç.
Малалла конференцире йĕркеленÿпе ĕç тапхăрĕ пуçланнă. Унта Чăваш Республикин Патшалăх Канашĕн депутачĕсен кандидатсен списокне пĕрлехи тата пĕр мандатлă суйлав округĕсем тăрăх палăртрĕç. Тăхтав вăхăтĕнче вăрттăн сасăларĕç, унăн пĕтĕмлетĕвне конференци делегачĕсем çирĕплетрĕç.
Конференци вĕçленес умĕн делегатсем умĕнче иккĕмĕш хула больницин тĕп тухтăрĕ Лидия Веденеева тухса калаçрĕ. Вăл парти членĕсене «пĕрлехи парти фрончĕ йĕркелеме», çынсемпе тĕл пулса пурнăçланă, малашлăх ĕçĕсем пирки каласа пама чĕнчĕ. Лидия Владимировна шухăшĕпе, партин кашни активлă членĕ хăйĕн тÿпине хывмалла - вара çĕнтерÿ пулатех. Унăн сăмахне алă çупса ырларĕç.
Приоритетсене палăртнă, хавхалану пысăк, малашлăх ĕçĕсем те чылай. Çапла кĕскен хак пама пулать «Единая Россия» партин конференцийĕн ĕç-хĕлне.
Владимир Путин:
«Единая Россия» партине суйлавçăсем шанчĕç. Çак çитĕнÿ вăхăтпа тĕрĕсленчĕ, ÿсĕмсемпе тата конкретлă ĕçсемпе, суйлав умĕнхи сăмахсем пурнăçа кĕртессипе яваплăха туйнипе çирĕпленчĕ. Эпир пĕтĕм йывăрлăха çĕнтерессе шанса тăратăп, çапах та кунта çынсене илтни кирлĕ. Вара малашлăхри тĕллевсене пурнăçа кĕртетпĕрех».
«Единая Россия» партин XV съездĕнче тухса каланинчен.
http://www.kremlin.ru/events/president/news/52279