23 июля 2016 г.
Аслă Раççей карттин варринче, Европа пайĕнче, хăйĕн мухтавлă историйĕпе тата культурипе, йăли-йĕркипе тата ĕçĕ-хĕлĕпе палăракан республика пур. Ку вăл çĕр пин сăмах, çĕр пин юрă, çĕр пин тĕрĕ çĕршывĕ - Чăваш Ен.
Наци телерадиокомпанийĕ пилĕк çул тултарнă май республикăра пурăнакансен тăван ен çинчен каласа пама шанăç пур. Çавна май Чăваш Ен телерадиокомпанийĕ, «Чăваш Ен» фонд тата Шупашкар хула администрацийĕ пулăшнипе «Чăваш ен - манăн республика» ятпа видеороликсен конкурсĕ старта тухнине пĕлтерет.
Конкурса кашни çын, 12 çултан аслăраххисем, хутшăнма пултараççĕ. Тĕп парнене тивĕçес тесен Чăваш Ене юратнине кăтартакан видео ÿкермелле те ntrkvideo@mail.ru. электрон адресĕпе ярса памалла.
Утă уйăхĕн 18-мĕшĕнчен пуçласа кашни эрнерех экспертсен ушкăнĕ чи лайăх 3 ролике палăртĕ, шăпах вĕсем конкурсăн финалне тухĕç. Çак роликсене Наци телекуравĕпе пĕр эрне кăтартĕç, вĕсем социаллă сетьсенче лайксем пухĕç. Конкурса юпа уйăхĕнче пĕтĕмлетеççĕ. Конкурс çĕнтерÿçисем Чăваш Ен çинчен калакан фильмпа историе кĕрсе юлĕç.